ວັນທີ 5 ເມສານີ້ ຢູ່ນະຄອນຫຼວງແຮນຊິງກີປະເທດແຟັງລັງ, ທ່ານ ສີຈິ້ນຜິງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ຈູຮາ ຊີປີລາ ນາຍົກລັດຖະມົນຕີປະເທດດັ່ງກ່າວ.
ທ່ານ ສີຈິ້ນຜິງ ກ່າວເນັ້ນວ່າ: ສາຍພົວພັນລະຫວ່າງຈີນ-ແຟງລັງຢູ່ບົນພື້ນຖານນ້ຳໃຈໄມຕີຈິດມິດຕະພາບແລະມີມູນເຊື້ອມາແຕ່ດົນນານ. ທັດສະນະ ແລະຍຸດທະສາດການພັດທະນາຂອງສອງປະເທດສອດຄ່ອງກັນໃນລະດັບສູງ, ການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງສອງຝ່າຍມີອະນາຄົດທີ່ສົດໃສ. ຈາກນີ້ຈີນຈຶ່ງຍິນດີຮ່ວມກັບແຟງລັງພະຍາຍາມຊຸກຍູ້ການຮ່ວມມືທີ່ແທ້ຈິງໃນຂົງເຂດຕ່າງໆເຊັ່ນ:ຂົງເຂດວິທະຍາສາດເຕັກໂນໂລຊີແບບປະດິດສ້າງໃໝ່,ການປະຢັດພະລັງງານແລະອະນຸລັກສິ່ງແວດລ້ອມ,ວຽກງານຂົ້ວໂລກເໜືອ,ການທ່ອງທ່ຽວ,ກິລາແລະຂົງເຂດອື່ນໆທີ່ສຳຄັນ.
ທ່ານ ສີຈິ້ນຜິງກ່າວຕື່ມວ່າ: ການພັດທະນາເອີຣົບມີຜົນດີຕໍ່ການຊຸກຍູ້ສັນຕິພາບແລະສະຖຽນລະພາບຂອງໂລກ ເຊິ່ງຫວັງວ່າແຟງລັງຈະເສີມຂະຫຍາຍບົດບາດຢ່າງຕັ້ງໜ້າກວ່າເກົ່າຕໍ່ການພັດທະນາການພົວພັນລະຫວ່າງຈີນ-ເອີຣົບ.
ທ່ານ ຊີປີລາ ກ່າວວ່າ: ແຟງລັງສະແດງຄວາມຊົມເຊີຍຕໍ່ຈີນທີ່ໄດ້ເສີມຂະຫຍາຍບົດບາດຢ່າງຕັ້ງໜ້າໃນວຽກງານຂອງໂລກ ທັງຍິນດີຮ່ວມກັບຈີນເປີດກວ້າງການຮ່ວມມືໃນຂົງເຂດຕ່າງໆພາຍໃນຂອບ "ໜຶ່ງແລວທາງໜຶ່ງເສັ້ນທາງ" ພ້ອມທັງສະໜັບສະໜູນການພັດທະນາການພົວພັນລະຫວ່າງສອງຝ່າຍ. ຂະນະດຽວກັນກໍຍິນດີຊຸກຍູ້ການຮ່ວມມືລະຫວ່າງປະເທດເອີຣົບເໜືອກັບຈີນໃຫ້ໄດ້ຮັບຄວາມຄືບໜ້າໃໝ່ຢ່າງບໍ່ຢຸດຢັ້ງ.
