ຕາມຂ່າວສານຊິນຮວາ: ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານຊາວລີ ວາຍນາໂມ ນີນີສໂຕ ປະທານາທິບໍດີແຟງລັງຢູ່ນະຄອນຫຼວງແຮນຊິງກີໃນວັນທີ 5 ເມສານີ້ ໂດຍປະມຸກລັດສອງປະເທດໄດ້ຕີລາຄາຄວາມຄືບໜ້າອັນໃຫຍ່ຫຼວງນັບແຕ່ສອງປະເທດສ້າງສາຍສຳພັນທາງການທູດໃນ 67 ປີມານີ້, ທັງໄດ້ຮ່ວມກັນຖະແຫຼງຢືນຢັນໃນການເຮັດໃຫ້ສາຍພົວພັນລະຫວ່າງຈີນກັບແຟງລັງເປັນສາຍພົວພັນຄູ່ຮ່ວມມືແບບໃໝ່ທີ່ອ່ວຍໜ້າໄປສູ່ອະນາຄົດ ແລະເນັ້ນວ່າ, ສອງຝ່າຍຈະເພີ່ມທະວີຄວາມໄວ້ເນື້ອເຊື່ອໃຈກັນທາງການເມືອງ, ລົງເລິກການຮ່ວມມືທີ່ຕິດແທດຕົວຈິງ ແລະສ້າງຄວາມຜາສຸກໃຫ້ແກ່ສອງປະເທດ ແລະປະຊາຊົນສອງຊາດ.
ປະມຸກລັດສອງປະເທດເປັນເອກະພາບກັນຢືນຢັນຕໍ່ການສ້າງ ແລະຊຸກຍູ້ສາຍພົວພັນຈີນ-ແຟງລັງເປັນສາຍພົວພັນຄູ່ຮ່ວມມືແບບໃໝ່ທີ່ອ່ວຍໜ້າໄປສູ່ອະນາຄົດ ແລະຢ້ຳຈະເຄົາລົບອະທິປະໄຕແລະຜືນແຜ່ນດິນອັນຄົບຖ້ວນຂອງກັນແລະກັນ, ຍຶດໝັ້ນຕ່າງຝ່າຍຕ່າງເຄົາລົບກັນ ແລະຫຼັກການສະເໝີພາບ, ພິຈາລະນາເຖິງຜົນປະໂຫຍດທີ່ເປັນແກນກາງແລະເປັນຄວາມເອົາໃຈໃສ່ຂອງກັນແລະກັນ. ໃນໂອກາດດັ່ງກ່າວ, ແຟງລັງກໍໄດ້ກ່າວຢ້ຳທີ່ຈະຍຶດໝັ້ນນະໂຍບາຍຈີນດຽວ ແລະຍິນດີພິຈາລະນາເຖິງຜົນປະໂຫຍດສຳຄັນໃນການຮ່ວມມືຂອງສອງຝ່າຍ.
ຫຼັງການພົບປະ, ປະມຸກລັດສອງປະເທດໄດ້ຮ່ວມກັນເປັນສັກຂີພິຍານໃຫ້ແກ່ການລົງນາມໃນເອກະສານຮ່ວມມືລະຫວ່າງສອງຝ່າຍໃນຂົງເຂດຕ່າງໆ ເຊັ່ນ: ການປະດິດສ້າງ, ລະບົບຍຸດຕິທຳ, ການຄົ້ນຄວ້າແລະການຮ່ວມມືກ່ຽວກັບໝີແພນດາ ແລະອື່ນໆ.
ຈາກນັ້ນ, ສອງຝ່າຍກໍໄດ້ເຜີຍແຜ່ "ຖະແຫຼງການຮ່ວມກ່ຽວກັບການສ້າງແລະຊຸກຍູ້ສາຍພົວພັນຄູ່ຮ່ວມມືແບບໃໝ່ທີ່ອ່ວາຍໜ້າໄປສູ່ອະນາຄົດລະຫວ່າງສາທາລະນະລັດປະຊາຊົນຈີນແລະສາທາລະນະລັດແຟງລັງ".