ທ່ານສະເວັດລານາ ປີເຕຣັນໂກ ໂຄສົກຄະນະສືບສວນ-ສອບສວນສະຫະພັນຣັດເຊຍ ກ່າວໃນວັນທີ 6 ເມສານີ້ວ່າ: ຫວ່າງແລ້ວນີ້, ເຈົ້າໜ້າທີ່ປະຕິບັດກົດໝາຍປະເທດຕົນສາມາດຈັບຜູ້ຕ້ອງສົງໄສຄະດີກໍ່ການຮ້າຍຈາກປະເທດອາຊີກາງໄດ້ຫຼາຍຄົນ ໂດຍພວກເຂົາໄດ້ຕິດຕໍ່ພົວພັນກັບອັກບາຊອນ ຈາລີລົຟ ຜູ້ຕ້ອງໄສຄະດີໂຈມຕີລົດໄຟໃຕ້ດິນເມືອງແຊງເປເຕີສະເບິກແບບກໍ່ການຮ້າຍ.
ນອກນີ້, ຂ່າວສານອິນເຕີແຟັກຣັດເຊຍ ຍັງໄດ້ລາຍງານໃນວັນທີ 6 ເມສານີ້ວ່າ, ເຈົ້າໜ້າທີ່ປະຕິບັດກົດໝາຍປະເທດຕົນສາມາດຈັບຊາວອາຊີກາງທີ່ຖືກສົງໄສມີສ່ວນກ່ຽວຂ້ອງກັບຄະດີດັ່ງກ່າວໄດ້ອີກ 3 ຄົນຢູ່ເຮືອນເຊົ່າຫຼັງໜຶ່ງຖະໜົນມິດຕະພາບ ທາງພາກຕາເວັນອອກເມືອງແຊງເປເຕີສະເບິກໃນຕອນຮຸ່ງເຊົ້າວັນດັ່ງກ່າວ ແລະຕໍ່ມາ, ເຈົ້າໜ້າທີ່ປະຕິບັດກົດໝາຍກໍໄດ້ແຍກປະຊາຊົນອອກຈາກອາຄານ ທັງກວດຄົ້ນເຮືອນເຊົ່າ ໂດຍສາມາດພົບອຸປະກອນປະກອບລະເບີດລູກໜຶ່ງ. ຈາກນັ້ນ, ເຈົ້າໜ້າທີ່ກໍເກັບກູ້ລະເບີດຢູ່ເຮືອນເຊົ່າຫຼັງດັ່ງກ່າວ.
ທັງນີ້ ໃນຕອນບ່າຍວັນທີ 3 ເມສານີ້ ສະຖານີລົດໄຟໃຕ້ດິນເມືອງແຊງເປເຕີສະເບິກໄດ້ເກີດລະເບີດ ແລະຫຼ້າສຸດ ມາເຖິງປັດຈຸບັນມີ 14 ຄົນເສຍຊີວິດ ແລະ 50 ກວ່າຄົນບາດເຈັບ.