ທະນາຄານພັດທະນາອາຊີຫຼື ADB ໄດ້ເຜີຍແຜ່ "ເບິ່ງການພັດທະນາຂອງອາຊີປີ 2017" ໃນວັນທີ 6 ເມສານີ້ຢູ່ນະຄອນຫຼວງມະນີລາປະເທດຟີລິບປິນໂດຍຊີ້ໃຫ້ເຫັນວ່າ: ຈີນພວມເລັ່ງຊຸກຍູ້ການປະຕິຮູບໂຄງປະກອບເສດຖະກິດໂດຍການບໍລິໂພກຈະສືບຕໍ່ກາຍເປັນສິ່ງທີ່ຊຸກຍູ້ເສດຖະກິດຈີນໃນປີ 2017 ໃຫ້ເຕີບໂຕຢ່າງໝັ້ນທ່ຽງ.
ບົດລາຍງານຊີ້ໃຫ້ເຫັນວ່າ: ປີ 2016, ຈີນບັນລຸມູນຄ່າການລົງທຶນຢູ່ຕ່າງປະເທດເຖິງ 211 ຕື້ໂດລາສະຫະລັດ ເຊິ່ງລື່ນຍອດມູນຄ່າການລົງທຶນຂອງວິສາຫະກິດຕ່າງປະເທດຢູ່ຈີນເປັນຄັ້ງທຳອິດ.
ທ່ານ ຢາຊຸຢຸກີ ຊາວະດາ ນັກເສດຖະສາດຜູ້ທີໜຶ່ງຂອງທະນາຄານພັດທະນາອາຊີກ່າວວ່າ: ເສດຖະກິດຈີນພວມພະຍາຍາມຫັນໄປສູ່ຮູບແບບຂະແໜງການການບໍລິໂພກແລະການບໍລິການ. ການໃຊ້ຈ່າຍໃນການບໍລິໂພກທີ່ເຂັ້ມແຂງ, ການກໍ່ສ້າງພື້ນຖານໂຄງລ່າງທີ່ສະໜັບສະໜູນໂດຍງົບປະມານຂອງລັດ ແລະ ການປະຕິຮູບໂຄງປະກອບເສດຖະກິດຈະຍົກ ສະມັດຕະພາບການຜະລິດອຸດສາຫະກຳໃຫ້ສູງຂຶ້ນ ແລະ ສ້າງພື້ນຖານໃຫ້ແກ່ເສດຖະກິດຈີນໄດ້ຢ່າງໜັກແໜ້ນ.