ກະຊວງອຸດສາຫະກຳແລະການຄ້າສາກົນມາເລເຊຍໄດ້ເຜີຍແຜ່ຕົວເລກການຄ້າຫຼ້າສຸດວ່າ: ໃນ 2 ເດືອນທຳອິດຂອງປີນີ້, ການສົ່ງອອກສິນຄ້າຂອງປະເທດຕົນມາຈີນໄດ້ເພີ່ມຂຶ້ນ 47,6% ເຊິ່ງບັນລຸມູນຄ່າເຖິງ 9 ຕື້ 600 ລ້ານຣິງກິດຫຼືປະມານ 2 ຕື້ 165 ລ້ານໂດລາສະຫະລັດ. ຈາກນີ້ຈຶ່ງເຮັດໃຫ້ຈີນສືບຕໍ່ເປັນປະເທດຄູ່ຄ້າໃຫຍ່ອັນດັບໜຶ່ງຂອງມາເລເຊຍ.
ທັງນີ້ໃນ 2 ເດືອນທຳອິດຂອງປີນີ້, ຍອດມູນຄ່າການຄ້າຂອງມາເລເຊຍໄດ້ເພີ່ມຂຶ້ນ 2,1% ເມື່ອທຽບໃສ່ໄລຍະດຽວກັນຂອງປີຜ່ານມາໂດຍບັນລຸເຖິງ 134 ຕື້ 800 ລ້ານຣິງກິດ, ໃນນັ້ນມູນຄ່າການສົ່ງອອກໄດ້ເພີ່ມຂຶ້ນ 26,5% ໂດຍມີຍອດມູນຄ່າເຖິງ 71 ຕື້ 800 ລ້ານຣິງກິດ ແລະກໍຫຼາຍກວ່າດັ່ງຄາດຄະເນໄວ້, ທັງເປັນຈັງຫວະການເຕີບໂຕທີ່ໃຫຍ່ທີ່ສຸດໃນໄລຍະເກືອບ 7 ປີຜ່ານມາ. ນີ້ເປັນເດືອນທີ 4 ຕິດຕໍ່ກັນທີ່ມາເລເຊຍບັນລຸມູນຄ່າການສົ່ງອອກໄດ້ຫຼາຍກວ່າ 70 ຕື້ຣິງກິດນັບແຕ່ເດືອນພະຈິກປີ 2016 ເປັນຕົ້ນມາ. ໃນນີ້ ຈີນກວມ 14,8% ຂອງຍອດມູນຄ່າການສົ່ງອອກສິນຄ້າ; ຖັດມາແມ່ນສິງກະໂປແລະສະຫະພາບເອີຣົບ.