ທ່ານຄາລົສ ໂດມິນກຸສ ລັດຖະມົນຕີກະຊວງການເງິນຟີລິບປີນກ່າວໃນວັນທີ 6 ເມສານີ້ວ່າ, ອາຊຽນຄວນສືບຕໍ່ຊຸກຍູ້ເສດຖະກິດຂອງພາກພື້ນຕົນເຊື່ອມໂຍງເຂົ້າກັນ, ໂດຍໃນອະນາຄົດຈະເຈາະຈົງພັດທະນາການຄ້າເອເລັກໂຕຣນິກ, ການກໍ່ສ້າງພື້ນຖານໂຄງລ່າງ, ເຮັດໃຫ້ການຄ້າສະດວກກວ່າເກົ່າແລະເປີດກວ້າງຕະຫຼາດບໍລິໂພກ.
ທ່ານ ໂດມິນກຸສ ໃຫ້ທັດສະນະດັ່ງກ່າວໃນໂອກາດເຂົ້າຮ່ວມກອງປະຊຸມສຳມະນາລັດຖະມົນຕີການເງິນອາຊຽນທີ່ຈັດຂຶ້ນໃນມື້ດັ່ງກ່າວ. ແລະທ່ານຍັງໄດ້ກ່າວຕື່ມວ່າ, ບັນດາປະເທດອາຊຽນລ້ວນແຕ່ຫວັງສ້າງກຸ່ມເສດຖະກິດພາກພື້ນທີ່ມີພະລັງຊີວິດຢ່າງແທ້ຈິງ. ແລະຈະໄດ້ຮັບຜົນປະໂຫຍດຈາກການຮ່ວມມືການຄ້າແລະການປັບປຸງເສດຖະກິດພາຍໃນ, ການສ້າງຕັ້ງເຂດການຄ້າເສລີໄດ້ຊຸກຍູ້ການຄ້າແລະການລົງທຶນຂອງອາຊຽນ, ແລະກໍຫວັງວ່າອາຊຽນຈະສາມາດປະກອບສ່ວນກຳລັງໃຫ້ແກ່ການເຕີບໂຕເສດຖະກິດຂອງໂລກຫຼາຍກວ່າເກົ່າ.
ທ່ານຍັງຮຽກຮ້ອງໃຫ້ນັກທຸລະກິດທົ່ວໂລກສົນໃຈ, ແລະເພີ່ມການລົງທຶນໃນອາຊຽນ. ເຊິ່ງໃນປັດຈຸບັນບັນດາປະເທດອາຊີຕາເວັນອອກສຽງໃຕ້ພວມພະຍາຍາມສ້າງປະຊາຄົມເສດຖະກິດອາຊຽນ, ຈຶ່ງຕ້ອງການການລົງທຶນຢ່າງຫຼວງຫຼາຍ. ແນວໃດກໍດີເຊື່ອວ່າເສດຖະກິດໃນຍຸກໂລກາພິວັດຄືເສັ້ນທາງພັດທະນາທີ່ຖືກຕ້ອງ, ເສດຖະກິດອາຊຽນມີຊ່ອງທາງພັດທະນາຢ່າງວ່ອງໄວ, ແລະຈະສ້າງລາຍຮັບໃຫ້ແກ່ຜູ້ລົງທຶນໄດ້ຢ່າງມະຫາສານ.