ຕາມຂ່າວສານຈີນ: ທ່ານທິນຈໍ ປະທານາທິບໍດີສາທາລະນະລັດສະຫະພາບມຽນມາໄດ້ເດີນທາງດ້ວຍເຮືອບິນພິເສດເຖິງເມືອງເສິງຕູແຂວງເສສວນ ເຊິ່ງເປັນການເລີ່ມຢ້ຽມຢາມ ສປ ຈີນເປັນຄັ້ງທຳອິດ.
ໂດຍຕອບສະໜອງຕາມຄຳເຊີນຂອງທ່ານສີຈິ້ນຜິງ ປະທານປະເທດຈີນ, ທ່ານທິນຈໍ ໄດ້ເດີນທາງໄປຢ້ຽມຢາມຈີນທາງລັດຖະກິດແຕ່ວັນທີ 6 ຫາວັນທີ 11 ເມສານີ້ ໂດຍແຂວງເສສວນເປັນຈຸດທຳອິດໃນໄລຍະຢ້ຽມຢາມຂອງທ່ານ. ຂ່າວແຈ້ງວ່າ, ຄະນະຜູ້ແທນທີ່ເດີນທາງຮ່ວມມາພ້ອມປະທານາທິບໍດີມຽນມາຄັ້ງນີ້ມີ 30 ກວ່າຄົນ ໄດ້ແກ່ລັດຖະມົນຕີສຳນັກງານທີ່ປຶກສາແຫ່ງລັດ, ລັດຖະມົນຕີກະຊວງການຄ້າ, ລັດຖະມົນຕີກະຊວງກໍ່ສ້າງ ແລະທ່ານອື່ນໆ.
ເຈົ້າໜ້າທີ່ທີ່ກ່ຽວຂ້ອງໃນຄະນະຜູ້ແທນດັ່ງກ່າວກ່າວວ່າ, ເສສວນຕັ້ງຢູ່ພາກຕາເວັນຕົກສຽງໃຕ້ຂອງຈີນ ຫ່າງຈາກມຽນມາບໍ່ໄກປານໃດ ແລະນັກທຸລະກິດແຂວງນີ້ກໍໄດ້ເຂົ້າໄປລົງທຶນຢູ່ມຽນມາ, ມຽນມາແລະເສສວນໄດ້ຮ່ວມມືໃນຂົງເຂດກະສິກຳ ແລະວິສະວະກຳ ຈິ່ງໄດ້ກາຍເປັນແຂວງສຳຄັນທີ່ທ່ານທິນຈໍໄປຢ້ຽມຢາມກ່ອນໝູ່. ຂະນະດຽວກັນ, ມຽນມາຫວັງຫຼັງການຢ້ຽມຢາມແຂວງເສສວນຄັ້ງນີ້ ຈະສາມາດຊຸກຍູ້ການຮ່ວມມື ລະຫວ່າງສອງຝ່າຍໄດ້ກວ້າງຂວາງກວ່າເກົ່າ.
 |
