ໂດຍຕອບສະໜອງຕາມຄຳເຊີນຂອງທ່ານໂດນັນ ທຣຳ ປະທານາທິບໍດີອາເມລິກາ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານທຣຳຢູ່ມາອາລາໂກ ລັດຟລໍຣິດາ ສະຫະລັດອາເມລິກາແຕ່ວັນທີ 6 ຫາວັນທີ 7 ເມສານີ້ໂດຍປະມຸກລັດສອງປະເທດໄດ້ແລກປ່ຽນຄວາມເຫັນກ່ຽວກັບສາຍພົວພັນຈີນ-ອາເມລິກາແລະບັນຫາສຳຄັນໃນສາກົນແລະພາກພື້ນທີ່ສອງຝ່າຍມີຄວາມສົນໃຈຮ່ວມກັນ ທັງໄດ້ບັນລຸຄວາມເປັນເອກະພາບກັນຫຼາຍປະການ.
ການພົບປະຄັ້ງນີ້ເປັນການທຳຄວາມເຂົ້າໃຈຢ່າງໃກ້ຊິດເທື່ອທຳອິດລະຫວ່າງປະມຸກລັດຈີນ-ອາເມລິກາຫຼັງຄະນະລັດຖະບານອາເມລິກາຊຸດໃໝ່ຂຶ້ນຮັບຕຳແໜ່ງ ເຊິ່ງໄດ້ຮັບຄວາມສົນໃຈຢ່າງກວ້າງຂວາງ. ຈາກນີ້, ຊ່ຽວຊານແລະນັກວິຊາການຂອງຫຼາຍປະເທດເຫັນວ່າ ຜ່ານຈາກການພົບປະຄັ້ງນີ້, ປະມຸກລັດສອງປະເທດໄດ້ເພີ່ມຄວາມເຂົ້າໃຈກັນ ແລະໄດ້ສ້າງສາຍພົວພັນເຮັດວຽກ ແລະມິດຕະພາບສ່ວນຕົວທີ່ດີ ທັງໄດ້ຊີ້ທິດທາງອັນຈະແຈ້ງໃຫ້ແກ່ການພັດທະນາສາຍພົວພັນຈີນ-ອາເມລິກາ.
ທ່ານໂຣເບີດ ໂຮມັສ ອະດີດຮອງລັດຖະມົນຕີກະຊວງການຕ່າງປະເທດ,ຮອງປະທານບໍລິສັດກິດຊິງເກີອາເມລິກາເຫັນວ່າ ຜ່ານຈາກການພົບປະຄັ້ງນີ້, ຜູ້ນຳສອງປະເທດໄດ້ແລກປ່ຽນຄວາມເຫັນແບບເຊີ້ງໜ້າກ່ຽວກັບສາຍພົວພັນສອງຝ່າຍແລະບັນຫາສຳຄັນໃນສາກົນແລະພາກພື້ນ ເຊິ່ງໄດ້ກຳນົດທິດທາງຂະຫຍາຍຕົວຂອງສາຍພົວພັນອາເມລິກາ-ຈີນໃນໄລຍະໃໝ່ ທັງໄດ້ສ້າງສາຍພົວພັນສ່ວນຕົວທີ່ດີອີກດ້ວຍ.
ທ່ານ ອາເລັກເຊ ມາສລົຟ ຫົວໜ້າຫ້ອງການຄົ້ນຄວ້າແລະສຶກສາວິທະຍາຕາເວັນອອກມະຫາວິທະຍາໄລເສດຖະສາດຣັດເຊຍກ່າວວ່າ: ການພົບປະຄັ້ງນີ້ຈະສ້າງການເລີ່ມຕົ້ນໃໝ່ທີ່ດີໃຫ້ແກ່ສາຍພົວພັນຈີນ-ອາເມລິກາ ໂດຍຜູ້ນຳສອງປະເທດລ້ວນແຕ່ສະແດງໃຫ້ເຫັນທ່າທີຍິນດີສົນທະນາກັນ ນີ້ຄືພື້ນຖານທີ່ດີສຳລັບການແລກປ່ຽນຄວາມເຫັນເພື່ອສະແຫວງຫາຄວາມເປັນເອກະພາບກັນ. ການທີ່ສາຍພົວພັນຈີນ-ອາເມລິກາຂະຫຍາຍຕົວຢ່າງປອດໃສໃນໄລຍະຍາວມີຄວາມໝາຍສຳຄັນຕໍ່ທົ່ວໂລກ, ຈາກນີ້, ທຸກການເຄື່ອນໄຫວຂອງສອງປະເທດຈິ່ງສົ່ງຜົນສະທ້ອນຕໍ່ການຄ້າ, ການທະນາຄານສາກົນກໍຄືຄວາມໝັ້ນຄົງຂອງສະຖານະການທາງການເມືອງສາກົນ.
ທ່ານດາວິດ ໂກເຊັດ ຊ່ຽວຊານບັນຫາສາກົນຂອງຝະຣັ່ງ, ຜູ້ກໍ່ຕັ້ງເວທີປຶກສາຫາລືຈີນ-ເອີຣົບກ່າວວ່າ: ການພົບປະລະຫວ່າງຜູ້ນຳຈີນ-ອາເມລິກາໄດ້ສະແດງໃຫ້ເຫັນຈິດໃຈມີຄວາມຕັ້ງໜ້າແລະທິດແທດຕົວຈິງ ເຊິ່ງເປັນສິ່ງທີ່ຂາດບໍ່ໄດ້ສຳລັບການພັດທະນາການຮ່ວມມືລະຫວ່າງສອງປະເທດໃນຕໍ່ໜ້າ.
ທ່ານຫຼີເຢິນລຽງ ຊ່ຽວຊານບັນຫາສາກົນຂອງສະຖາບັນບັນດິດພັດທະນະບໍລິຫານສາດແຫ່ງຊາດໄທໄດ້ເອົາໃຈໃສ່ວ່າ ປະທານປະເທດສີຈິ້ນຜິງເນັ້ນວ່າ ຈີນຍິນດີຕ້ອນຮັບອາເມລິກາເຂົ້າຮ່ວມການຮ່ວມມືໃນຂອບ "ໜຶ່ງແລວທາງໜຶ່ງເສັ້ນທາງ". ທ່ານຫຼີເຢິນລຽງເຫັນວ່າ: ການຮ່ວມມືລະຫວ່າງຈີນ-ອາເມລິກາມີໂອກາດຢ່າງຫຼວງຫຼາຍ ເຊິ່ງຄືດັ່ງທ່ານປະທານສີຈິ້ນຜິງໄດ້ສະເໜີອອກມາວ່າ ຊຸກຍູ້ການເຈລະຈາສັນຍາການລົງທຶນສອງຝ່າຍ, ສົ່ງເສີມການຄ້າແລະການລົງທຶນສອງຝ່າຍໃຫ້ຂະຫຍາຍຕົວຢ່າງປອດໃສ ທັງຄົ້ນຄວ້າການຮ່ວມມືຕົວຈິງໃນຂົງເຂດການກໍ່ສ້າງພື້ນຖານໂຄງລ່າງ, ພະລັງງານແລະຂົງເຂດອື່ນໆ. ທັງໝົດເຫຼົ່ານີ້ລ້ວນແຕ່ແມ່ນທິດທາງການຮ່ວມມືຈີນ-ອາເມລິກາໃນຕໍ່ໜ້າ.
ທ່ານປາຕຣິກ ມາລູຄີ ນັກວິຊາການວິທະຍາການຕ່າງປະເທດມະຫາວິທະຍາໄລໄນໂຣບີປະເທດເຄັນຢາກ່າວວ່າ: ຜູ້ນຳສອງປະເທດຈີນ-ອາເມລິກາລ້ວນແຕ່ຢືນຢັນວ່າ ການພົບປະຄັ້ງນີ້ໄດ້ຮັບໝາກຜົນທີ່ດີແລະອຸດົມສົມບູນ, ທັງສອງປະເທດມີໜ້າທີ່ຮັບຜິດຊອບຮ່ວມໃນການປົກປັກຮັກສາສັນຕິພາບ,ສະຖຽນລະພາບຂອງໂລກ, ສົ່ງເສີມການພັດທະນາກ້າວໜ້າຂອງມວນມະນຸດແລະອື່ນໆ, ການເພີ່ມທະວີການສົນທະນາແລະການຮ່ວມມືຄືທາງເລືອກທີ່ຖືກຕ້ອງພຽງດຽວຂອງສອງປະເທດ.
 |
