ວັນທີ 9 ເມສານີ້ຕາມເວລາທ້ອງຖິ່ນ, ຢູ່ໂບດສອງແຫ່ງຢູ່ ອາເລັກຊັນເດຣຍ ເມືອງທ່າກຳປັ່ນທາງພາກເໜືອ ແລະ ເມືອງຕັນຕາທາງພາກກາງຂອງເອຢິບທີ່ຕັ້ງຢູ່ສາມຫຼ່ຽມແມ່ນ້ຳນິນໄດ້ເກີດເຫດໂຈມຕີດ້ວຍລະເບີດ ເຊິ່ງມາຮອດປັດຈຸບັນມີປະຊາຊົນ 47 ຄົນເສຍຊີວິດ. ຫຼັງເກີດເຫດ,ທ່ານ ອັບເດວ ຟັດຕາ ເອວ ຊີຊີ ປະທານາທິບໍດີເອຢິບກໍໄດ້ປະກາດພາວະສຸກເສີນເປັນເວລາ 3 ເດືອນຂະນະທີ່ກຸ່ມຫົວຮຸນແຮງ IS ໄດ້ກ່າວອ້າງຄວາມຮັບຜິດຊອບຕໍ່ເຫດລະເບີດສອງລາຍດັ່ງກ່າວ.
ນອກນີ້, ສະພາຄວາມໝັ້ນຄົງອົງການສະຫະປະຊາຊາດໄດ້ອອກມາປະນາມຕໍ່ເຫດການໂຈມຕີດັ່ງກ່າວ ແລະກ່າວວ່ານີ້ເປັນການກະທຳທີ່ເຮັດໃຫ້ສັງຄົມໂລກຄຽດແຄ້ນທີ່ສຸດ. ຂະນະທີ່ທ່ານ ອານໂຕນີໂອ ກູເຕີຣິສ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການຜ່ານໂຄສົກຂອງຕົນ ໂດຍການກ່າວປະນາມຕໍ່ເຫດລະເບີດໂບດຢູ່ສອງເມືອງດັ່ງກ່າວ ພ້ອມທັງໄດ້ຮຽກຮ້ອງໃຫ້ຈັບຜູ້ກໍເຫດມາລົງໂທດຕາມກົດໝາຍ.