ຕາມຂ່າວສານຊິນຮວາ: ເຈົ້າໜ້າທີ່ກອງທັບເຮືອທີສາມຂອງອາເມລິກາໄດ້ຖະແຫຼງໃນວັນທີ 8 ເມສານີ້ວ່າ, ກອງກຳປັ່ນບັນທຸກເຮືອບິນ "ຄານວິນຊັນ CVN - 70" ຂອງຕົນໄດ້ເດີນທາງອອກຈາກສິງກະໂປ ມຸ່ງໜ້າສູ່ເຂດທະເລທີ່ໃກ້ແຫຼມເກົາຫຼີ ໂດຍພາຍຫຼັງປ່ຽນແຜນຈະໄປອົສຕຣາລີໃນເບື້ອງຕົ້ນ.
ສຳນັກ CNN ໄດ້ລາຍງານຕາມການເປີດເຜີຍຂອງເຈົ້າໜ້າທີ່ທະຫານອາເມລິກາມາວ່າ, ການເຄື່ອນໄຫວຂອງກອງກຳປັ່ນບັນທຸກເຮືອບິນ "ຄານວິນຊັນ CVN - 70" ເປັນການໂຕ້ຕອບຕໍ່ການທ້າທາຍຂອງ ສປປ ເກົາຫຼີໃນມໍ່ໆມານີ້. ກອງກຳປັ່ນບັນທຸກເຮືອບິນ "ຄານວິນຊັນ CVN - 70" ທີ່ມີທ່າຢູ່ເມືອງຊັນດີເອໂກຂອງລັດກາລີໂຟເນຍສະຫະລັດອາເມລິກາ ໄດ້ໄປປະຕິບັດໜ້າທີ່ຢູ່ພາກຕາເວັນຕົກຂອງມະຫາສະໝຸດປາຊີຟິກເມື່ອຕົ້ນເດືອນມັງກອນຜ່ານມາ ແລະເຂົ້າຮ່ວມຊ້ອມຮົບກັບຍີ່ປຸ່ນແລະສ.ເກົາຫຼີ.