ຕາມຂ່າວສານຊິນຮວາ: ເວັບໄຊທາງການຂອງຄະນະຈັດງານກິລາໂອລິມປິກລະດູໜາວປັກກິ່ງ ໄດ້ອອກປະກາດໃນວັນທີ 10 ເມສານີ້ ໂດຍໄດ້ແຈ້ງການເຊີນທະນາຄານຂອງຈີນແລະຕ່າງປະເທດທີ່ຕ້ອງການສະໜັບສະໜູນງານກິລາໂອລິມປິກລະດູໜາວແລະງານກິລາໂອລິມປິກຄົນພິການລະດູໜາວປີ 2022 ທີ່ຈະຈັດຂຶ້ນຢູ່ນະຄອນຫຼວງປັກກິ່ງ ເພື່ອເປັນຄູ່ຮ່ວມມື. ທະນາຄານຂອງຈີນແລະຕ່າງປະເທດທີ່ໄດ້ຮັບຄຸນວຸດທິອະນຸຍາດດ້ານການທະນາຄານຈາກອົງການຕິດຕາມຄຸ້ມຄອງຂະແໜງການທະນາຄານຈີນຕາມກົດໝາຍນັ້ນ ລ້ວນແຕ່ສາມາດສະເໜີການສະໜັບສະໜູນໃຫ້ຄະນະຈັດງານໂອລິມປິກລະດູໜາວປັກກິ່ງຢ່າງເປັນທາງການກ່ອນ 17 ໂມງຂອງວັນທີ 14 ເມສານີ້.
ຂ່າວແຈ້ງວ່າ, ນີ້ແມ່ນຄູ່ຮ່ວມມືທາງການແຫ່ງທຳອິດທີ່ຄະນະຈັດງານກິລາໂອລິມປິກລະດູໜາວປັກກິ່ງຮ້ອງຂໍຢ່າງເປີດເຜີຍແລະເປັນທາງການ ຫຼັງຈັດງານຖະແຫຼງຂ່າວກ່ຽວກັບການເລີ່ມດຳເນີນແຜນການພັດທະນາຕະຫຼາດເມື່ອວັນທີ 27 ກຸມພາຜ່ານມາ.
 |
