ວັນທີ 10 ເມສານີ້, ທ່ານຮາຊັນ ຣູຮານີ ປະທານາທິບໍດີອີຣານໄດ້ປະນາມອາເມລິກາທີ່ຍິງລູກສອນໄຟນຳວິຖີໃສ່ຊີຣີ ໂດຍເຫັນວ່າ ການກະທຳດັ່ງກ່າວເປັນການສະໜັບສະໜູນພວກກໍ່ການຮ້າຍໃຫ້ສືບຕໍ່ສ້າງຄວາມຫາຍະນະຢູ່ຊີຣີ.
ທ່ານຣູຮານີຢືນຢັນໃນພິທີຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງເຕເຮຣານໃນວັນທີ 10 ເມສານີ້ວ່າ: ການທີ່ອາເມລິກາໂຈມຕີຊີຣີທາງການທະຫານນັ້ນເປັນການຝ່າຝືນ ກົດໝາຍລະຫວ່າງຊາດ ແລະການໂຈມຕີເທື່ອນີ້ບໍ່ພຽງແຕ່ໄດ້ສົ່ງຜົນກະທົບໃຫ້ແກ່ການເຈລະຈາສັນຕິພາບຂອງຊີຣີເທົ່ານັ້ນ ຫາກຍັງຈະເຮັດໃຫ້ກຸ່ມກໍ່ການຮ້າຍມີໂອກາດຟື້ນແລະເຕີບໃຫຍ່ຂະຫຍາຍຕົວອີກດ້ວຍ.
ທ່ານຣູຮານີກ່າວຢ້ຳວ່າ: ມີແຕ່ໃຊ້ວິທີທາງການເມືອງເທົ່ານັ້ນຈິ່ງຈະສາມາດແກ້ໄຂວິກິດການຊີຣີໄດ້, ຊະຕາກຳຂອງຊີຣີຄວນໃຫ້ປະຊາຊົນຊີຣີຕັດສິນດ້ວຍຕົນເອງ ແລະປະເທດໃດໆກໍບໍ່ຄວນແຊກແຊງວຽກງານພາຍໃນຊີຣີ.
ທັງນີ້ໃນຕອນຮຸ່ງເຊົ້າວັນທີ 7 ເມສານີ້ ຕາມເວລາທ້ອງຖິ່ນ, ອາເມລິກາໄດ້ໂຈມຕີໂດຍຍິງລູກສອນໄຟຄຣູສ(Cruise Missile) 50 ກວ່າລູກໃສ່ຖານທັບອາກາດແຫ່ງໜຶ່ງຂອງຊີຣີ.