ຄະນະກຳມະການສາທາລະນະສຸກແລະວາງແຜນຄອບຄົວແຫ່ງຊາດຈີນໄດ້ລາຍງານສະພາບຄວາມປອດໄພຂອງເລືອດໃນທົ່ວປະເທດວ່າ: ປີ 2016, ທົ່ວປະເທດມີປະຊາຊົນ 14 ລ້ານເທື່ອຄົນໄດ້ເຂົ້າຮ່ວມບໍລິຈາກເລືອດເພື່ອສັງຄົມເຊິ່ງເພີ່ມຂຶ້ນ 6,1% ເມື່ອທຽບໃສ່ປີ 2015 ແລະເປັນຈຳນວນຫຼາຍທີ່ສຸດ.
ໃນຊຸມປີຜ່ານມາ, ຄວາມສາມາດໃນການຮັບປະກັນສະໜອງເລືອດຂອງຈີນໄດ້ເພີ່ມຂຶ້ນຢ່າງບໍ່ຢຸດຢັ້ງ ໂດຍໃນທົ່ວປະເທດໄດ້ຕັ້ງຈຸດບໍລິຈາກເລືອດຄົງທີ່ 1.262 ຈຸດ ເຊິ່ງເພີ່ມຂຶ້ນ 5% ເມື່ອທຽບໃສ່ປີ 2015, ລົດຮັບການບໍລິຈາກເລືອດ 1.584 ຄັນ ເພີ່ມຂຶ້ນ 1,3% ແລະ ລົດນຳສົ່ງເລືອດ 1.484 ຄັນ ເພີ່ມຂຶ້ນ 5,9%. ເຈົ້າໜ້າທີ່ທີ່ກ່ຽວຂ້ອງຂອງຄະນະກຳມະການສາທາລະນະສຸກແລະວາງແຜນຄອບຄົວແຫ່ງຊາດຈີນກ່າວວ່າ: ລະບົບການຮັບປະກັນຮ່ວມກັນໃນພາກພື້ນເຮັດໃຫ້ຄວາມແຕກໂຕນກັນລະຫວ່າງຄວາມຕ້ອງການໃນການສະໜອງເລືອດຕາມລະດູການແລະຂອບເຂດໄດ້ຫຼຸດລົງຢ່າງມີປະສິດທິຜົນ.
 |
