ວັນທີ 13 ເມສານີ້ຢູ່ນະຄອນຫຼວງມົສກູ, ທ່ານວຣາດີເມຍປູຕິນ ປະທານາທິບໍດີຣັດເຊຍໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຈ່າງກ່າວລີ້ ຮອງນາຍົກລັດຖະມົນຕີຈີນໃນໂອກາດຢ້ຽມຢາມປະເທດດັ່ງກ່າວຕາມຄຳເຊີນ.
ໂອກາດດັ່ງກ່າວ, ທ່ານຈ່າງກ່າວລີ້ຢືນຢັນວ່າ ຈີນຈະເປັນເຈົ້າພາບຈັດກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ຢູ່ນະຄອນຫຼວງປັກກິ່ງແຕ່ວັນທີ 14-15 ພຶດສະພາໜ້ານີ້ ແລະຈີນຖືຣັດເຊຍເປັນຄູ່ຮ່ວມມືສຳຄັນທີ່ຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ" ຈາກນີ້, ຈີນຈະກຳນົດຢ່າງລະອຽດຮອບຄອບເພື່ອຕ້ອນຮັບທ່ານປະທານາທິບໍດີປູຕິນເຂົ້າຮ່ວມເວທີປຶກສາຫາລືຄັ້ງນີ້. ນອກນີ້, ຈີນກໍໃຫ້ຄວາມສຳຄັນສູງທັງສະໜັບສະໜູນຂໍ້ລິເລີ່ມ "ສາຍພົວພັນຄູ່ຮ່ວມມືເອີຣົບ-ອາຊີ" ທີ່ສະເໜີໂດຍຣັດເຊຍ, ແນວໃດກໍດີ, ຂະແໜງການກ່ຽວຂ້ອງຂອງສອງຝ່າຍຈະໄດ້ສຶກສາຄົ້ນຄວ້າມາດຕະການຕົວຈິງຕື່ມອີກ.
ທ່ານປູຕິນໄດ້ສົ່ງຄວາມຢື້ຢາມຖາມຂ່າວອັນສະໜິດສະໜົມແລະພອນໄຊອັນປະເສີດ ເຖິງທ່ານປະທານສີຈິ້ນຜິງຜ່ານທ່ານຈ່າງກ່າວລີ້ ທັງຢືນຢັນວ່າ ດີໃຈຫຼາຍທີ່ຈະເດີນທາງໄປຈີນເຂົ້າຮ່ວມກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ຕາມຄຳເຊີນຂອງທ່ານປະທານສີຈິ້ນຜິງ. ຂະນະດຽວກັນ,ຣັດເຊຍກໍຍິນດີຕ້ອນຮັບນັກລົງທຶນຈີນເພື່ອປະກອບສ່ວນພັດທະນາເສດຖະກິດສັງຄົມໃນປະເທດຕົນ.ແນວໃດກໍດີ, ບົນພື້ນຖານການຮ່ວມມືໃນປັດຈຸບັນ, ຍັງຕ້ອງໄດ້ບຸກເບີກຂົງເຂດການຮ່ວມມືໃໝ່ຕື່ມອີກເພື່ອເພີ່ມພະລັງແຮງອັນໃໝ່ເສີມຂະຫຍາຍສາຍພົວພັນຄູ່ປະສານງານຍຸດທະສາດຮອບດ້ານຣັດເຊຍ-ຈີນ.