ທ່ານ ເຊີແກ ລາວຼົຟ, ລັດຖະມົນຕີກະຊວງການຕ່າງປະເທດຣັດເຊຍ, ທ່ານ ໂມຮຳມັດ ຈາວັດ ຊາຣິຟ ລັດຖະມົນຕີກະຊວງການຕ່າງປະເທດອີຣານ ແລະ ທ່ານ ວາລິດ ມູອາເລັມ ລັດຖະມົນຕີກະຊວງການຕ່າງປະເທດຊີຣີໄດ້ພົບປະກັນຢູ່ນະຄອນຫຼວງມົສກູປະເທດຣັດເຊຍໃນວັນທີ 14 ເມສານີ້ ເພື່ອຫາລືບັນຫາຕ່າງໆເຊັ່ນ: ການໂຈມຕີທາງການທະຫານຕໍ່ຊີຣີຂອງອາເມລິກາ, ການສືບສວນເຫດການໂຈມຕີດ້ວຍອາວຸດເຄມີ, ການເຈລະຈາສັນຕິພາບຂອງຊີຣີກໍຄືການຕ້ານການກໍ່ການຮ້າຍຮ່ວມເປັນຕົ້ນ.
ຫຼັງການເຈລະຈາ, ທ່ານ ເຊີແກ ລາວຼົຟ ໄດ້ກ່າວໃນພິທີຖະແຫຼງຂ່າວວ່າ: ຣັດເຊຍ, ອີຣານແລະຊີຣີມີຄວາມເຫັນເປັນເອກະພາບກັນວ່າອາເມລິກາກໍ່ການໂຈມຕີທາງການທະຫານຕໍ່ຖານທັບອາກາດຂອງຊີຣີໃນວັນທີ 7 ເມສານີ້ເປັນການກະທຳຮຸກຮານ, ໄດ້ລະເມີດກົດໝາຍສາກົນແລະ "ກົດບັດສະຫະປະຊາຊາດ" ຢ່າງໜັກໜ່ວງ. 3 ປະເທດໄດ້ຮຽກຮ້ອງໃຫ້ອາເມລິກາພ້ອມພັນທະມິດຈົ່ງເຄົາລົບອະທິປະໄຕຂອງຊີຣີ,ທັງຮັບປະກັນບໍ່ໃຫ້ການກະທຳຄ້າຍຄືກັນທີ່ເຮັດໃຫ້ສະຖານະການເຄັ່ງຕຶງຂຶ້ນນັ້ນເກີດຂຶ້ນອີກ. ຂະນະດຽວກັນ, ສາມຝ່າຍຍັງມີຈຸດຢືນໃຫ້ສ້າງຕັ້ງໜ່ວຍສືບສວນພາຍໃຕ້ການຊີ້ນຳຂອງອົງການເກືອດຫ້າມອາວຸດເຄມີ, ເພື່ອດຳເນີນການສືບສວນຢ່າງເຖິງຖອງ,ພາວະວິໄສແລະຍຸດຕິທຳຕໍ່ເຫດໂຈມຕີດ້ວຍອາວຸດເຄມີທີ່ເກີດຂຶ້ນຢູ່ຊີຣີໃນວັນທີ 4 ເມສານີ້.
 |
