ວັນທີ 14 ເມສານີ້, ທ່ານເກີງສວງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວກ່ຽວກັບສະຖານະການແຫຼມເກົາຫຼີວ່າ, ຈີນຕິດຕາມການປ່ຽນແປງຂອງສະຖານະການຢ່າງໃກ້ຊິດມາໂດຍຕະຫຼອດ.
ທັງນີ້,ໃນກອງປະຊຸມຂ່າວທີ່ຈັດຂຶ້ນໃນວັນດັ່ງກ່າວ, ມີນັກຂ່າວຖາມວ່າ, ຂ່າວສານອາເປລາຍງານວ່າ, ສປປເກົາຫຼີໄດ້ກຽມພ້ອມແລ້ວທີ່ຈະດຳເນີນການທົດລອງນິວເຄຼຍອີກຄັ້ງ,ນອກນີ້ມີຂ່າວລາຍງານອີກວ່າ, ປະເທດດັ່ງກ່າວໄດ້ເລິ່ມແຍກຍ້າຍປະຊາຊົນສ່ວນໜຶ່ງແລ້ວ, ຈີນໄດ້ກະກຽມບາງປະການບໍ່ເພື່ອຮັບມືກັບເລື່ອງນີ້?
ທ່ານເກີງສວງກ່າວວ່າ, ໃນມະຕິຕໍ່ສປປເກົາຫຼີຂອງສະພາຄວາມໝັ້ນຄົງສະຫະປະຊາຊາດໄດ້ຮຽກຮ້ອງໃຫ້ສປປເກົາຫຼີປະລະແຜນການນິວເຄຼຍທັງໝົດ, ແລະຢຸດຕິການເຄື່ອນໄຫວທີ່ກ່ຽວຂ້ອງ, ນີ້ແມ່ນຂໍ້ກຳນົດທີ່ແຈ່ມແຈ້ງທີ່ສຸດ. ສະຖານະການແຫຼມເກົາຫຼີໃນປັດຈຸບັນທັງສັບສົນ ທັງອ່ອນໄຫວ, ຈີນໄດ້ຮຽກຮ້ອງຫຼາຍເທື່ອໂດຍໃຫ້ຝ່າຍຕ່າງໆທີ່ກ່ຽວຂ້ອງຮັກສາຄວາມອົດກັ້ນ,ບໍ່ຄວນໃຊ້ການກະທຳທີ່ອາດຈະເຮັດໃຫ້ສະຖານະການແຫຼມເກົາຫຼີເຄັ່ງຕຶງຍິ່ງຂຶ້ນ. ຂະນະທີ່ການກະທຳແບບນີ້ລ້ວນແຕ່ເປັນການກະທຳບໍ່ຮັບຜິດຊອບ, ທັງມີອັນຕະລາຍທີ່ສຸດ.
ທ່ານເກີງສວງກ່າວຕື່ມວ່າ, ໃນເວລາດົນນານມານີ້, ຈີນໄດ້ຍຶດໝັ້ນຊຸກຍູ້ເປົ້າໝາຍທີ່ໃຫ້ແຫຼມເກົາຫຼີປອດນິວເຄຼຍ, ຍຶດໝັ້ນຮັກສາສັນຕິພາບ ແລະ ສະເຖຍລະພາບຂອງແຫຼມເກົາຫຼີ, ຍຶດໝັ້ນແກ້ໄຂບັນຫາທີ່ກ່ຽວຂ້ອງໂດຍສັນຕິໂດຍຜ່ານການເຈລະຈາ ແລະ ປຶກສາຫາລື. ແນວໃດກໍດີ,ຈີນຈະສືບຕໍ່ພົວພັນກັບຝ່າຍຕ່າງໆທີ່ກ່ຽວຂ້ອງຢ່າງໃກ້ຊິດ ແລະສຸມທຸກຄວາມພະຍາຍາມເພື່ອບັນລຸເປົ້າໝາຍດັ່ງກ່າວ.