ທ່ານວາງອີ້ ລັດຖະມົນຕີກະຊວງການຕ່າງປະເທດຈີນໄດ້ໂທລະສັບສົນທະນາກັບທ່ານເຊີເກ ລາຟຣົຟ ລັດຖະມົນຕີກະຊວງການຕ່າງປະເທດຣັດເຊຍໃນຄ່ຳວັນທີ 14 ເມສານີ້ ໂດຍສອງຝ່າຍໄດ້ແລກປ່ຽນຄວາມຄິດຄວາມເຫັນດ້ານຍຸດທະສາດຕໍ່ບັນຫາສາກົນ ແລະ ພາກພື້ນທີ່ສົນໃຈຮ່ວມກັນ ເຊັ່ນ, ການພົວພັນລະຫວ່າງສອງຝ່າຍ, ບັນຫາຊີຣີ ແລະ ບັນຫາແຫຼມເກົາຫຼີເປັນຕົ້ນ.
ສອງຝ່າຍກ່າວເປັນເອກະສັນກັນວ່າ, ຈະຕັ້ງໜ້າຈັດຕັ້ງປະຕິບັດຄວາມຮັບຮ້ທີ່ເປັນເອກະສັນກັນຂອງປະມຸກລັດສອງປະເທດກ່ຽວກັບການຂະຫຍາຍການພົວພັນຈີນ-ຣັດເຊຍແລະສຸມໃສ່ກະກຽມການໄປມາຫາສູ່ລະຫວ່າງເຈົ້າໜ້າທີ່ຂັ້ນສູງຕ່າງໆໃນໄລຍະມໍ່ໆນີ້ໃຫ້ດີ.
ກ່ຽວກັບສະຖານະການຊີຣີ, ທ່ານວາງອີ້ກ່າວວ່າ, ເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊີຣີຄວນໄດ້ຮັບຄວາມເຄົາລົບນັບຖື. ວຽກງານຮີບດ່ວນ ໃນປະຈຸບັນແມ່ນ ການສຳຫຼວດທີ່ເປັນອິດສະຫຼະ, ຍຸດຕິທຳ ແລະ ມີວິຊາການຕໍ່ເຫດການໃຊ້ອາວຸດເຄມີໃນຊີຣີ, ເຊື່ອວ່າຈະໄດ້ຮັບຄວາມກະຈ່າງແຈ້ງໃນທີ່ສຸດ.
ກ່ຽວກັບສະຖານະການແຫຼມເກົາຫຼີ, ທ່ານວາງອີ້ກ່າວວ່າ, ການປ້ອງກັນບໍ່ໃຫ້ແຫຼມເກົາຫຼີເກີດສົງຄາມ ແລະ ປັ່ນປ່ວນວຸ້ນວາຍເປັນການສອດຄ່ອງກັບຜົນປະໂຫຍດຮ່ວມຂອງຈີນ ແລະ ຣັດເຊຍ. ຂະນະທີ່ການຊຸກຍູ້ໃຫ້ຝ່າຍຕ່າງໆຟື້ນຟູການເຈລະຈາແມ່ນເປົ້າໝາຍຮ່ວມຂອງຈີນ ແລະ ຣັດເຊຍ. ແນວໃດກໍດີ,ຈີນຍິນດີປະສານສົມທົບກັບຣັດເຊຍຢ່າງໃກ້ຊິດ ເພື່ອຊຸກຍູ້ໃຫ້ສະຖານະການແຫຼມເກົາຫຼີຜ່ອນຄາຍລົງໂດຍໄວ ແລະ ຊຸກຍູ້ໃຫ້ຝ່າຍຕ່າງໆທີ່ກ່ຽວຂ້ອງຟື້ນຟູການເຈລະຈາ.