ຕາມຂ່າວສານອີຣານລາຍງານວ່າ: ວັນທີ 15 ເມສານີ້, ໃນເວລາທ່ານຮາຊັນ ຣູຮານີ ປະທານາທິບໍດີອີຣານເຂົ້າຮ່ວມງານວາງສະແດງຜົນສຳເລັດປ້ອງກັນປະເທດຢູ່ເຕເຮຣານ, ທ່ານກ່າວວ່າ: ອີຣານແມ່ນຜູ້ຖືກທຳຮ້າຍໃນການໂຈມຕີຂອງສັດຕູ, ອີຣານເພີ່ມກຳລັງຮົບ, ຄົ້ນຄວ້າຜະລິດລູກສອນໄຟນຳວິຖີແລະຍົນຮົບນັ້ນບໍ່ຕ້ອງໄດ້ຮັບການອະນຸຍາດຈາກຜູ້ໃດ.
ທ່ານຣູຮານີກ່າວວ່າ: ອີຣານເພີ່ມຄວາມສາມາດປ້ອງກັນຂອງກຳລັງຮົບພຽງແຕ່ເພື່ອປ້ອງກັນປະເທດເທົ່ານັ້ນ, ອີຣານຈະບໍ່ໂຈມຕີປະເທດອື່ນໃນເວລາໃດໆ, ຈະບໍ່ກໍ່ການຮຸກຮານ, ແຕ່ອີຣານຕ້ອງຮັກສາສະຕິລະວັງຕົວຢ່າງສະເໝີຕົ້ນສະເໝີປາຍ, ເພາະວ່າຫຼັງຈາກການປະຕິວັດອິສລາມໄດ້ຮັບໄຊຊະນະແລ້ວ, ອີຣານໄດ້ຖືກຮຸກຮານຫຼາຍເທື່ອທາງດ້ານການເມືອງ ເສດຖະກິດແລະການທະຫານ. ອີຣານຕ້ອງບັນລຸແຜນການແລະເປົ້າໝາຍປ້ອງກັນປະເທດຂອງຕົນ, ຊ່ຽວຊານອີຣານຄົ້ນຄວ້າຜະລິດຍົນຮົບ ຍົນເຮລິກົບເຕ ລົດຕັງແລະລົດຫຸ້ມເກາະແມ່ນຄວາມພາກພູມໃຈຂອງປະຊາຊົນອີຣານ.
ປະທານາທິບໍດີອີຣານຍັງກ່າວວ່າ: ການປົກປັກຮັກສາຄວາມດຸນດ່ຽງດ້ານຍຸດທະສາດໃນພາກພື້ນ, ຮັກສາຄວາມເຂັ້ມແຂງດ້ານການປ້ອງກັນປະເທດຂອງອີຣານແລະສົ່ງສັນຍານຍຸດຕິທຳແລະເສລີພາບຕໍ່ໂລກແມ່ນສິ່ງທີ່ອີຣານຕ້ອງເຮັດ, ການຮຸກຮານທີ່ກໍ່ຂຶ້ນໂດຍປະເທດໃນບາງພາກພື້ນ ປະເທດໃຫຍ່ແລະອາເມລິກາຢູ່ເຂດຕາເວັນອອກກາງນັ້ນແມ່ນແຫຼ່ງກຳເນີດຂອງຄວາມບໍ່ໝັ້ນຄົງແລະການປະທະກັນຢູ່ເຂດຕາເວັນອອກກາງ.
 |
