ຕາມຂ່າວCRI: ວັນທີ 14 ເມສານີ້, ທ່ານຈາຄົບ ລູ, ອະດີດລັດຖະມົນຕີກະຊວງການເງິນອາເມລິກາກ່າວວ່າ, ການສ້າງການພົວພັນຮ່ວມມືດ້ານເສດຖະກິດການຄ້າຢ່າງແໜ້ນແຟ້ນກວ່າເກົ່າບໍ່ພຽງແຕ່ມີຜົນດີຕໍ່ການເຕີບໂຕດ້ານເສດຖະກິດຂອງອາເມລິກາກັບຈີນເທົ່ານັ້ນ, ຍັງຈະເຮັດໃຫ້ໂລກໄດ້ຮັບຜົນປະໂຫຍດ.
ວັນທີ 14 ເມສານີ້, ທ່ານຈາຄົບ ລູກ່າວໃນເວທີປຶກສາຫາລືການຈ້ອງມອງປະເທດຈີນຄັ້ງທີ 6 ຢູ່ມະຫາວິທະຍາໄລໂກລົມບີວ່າ, ອາເມລິກາກັບຈີນມີໂອກາດຮ່ວມມືທີ່ຕ່າງຝ່າຍຕ່າງມີຜົນປະໂຫຍດຫຼາຍໃນດ້ານການລົງທຶນແລະການຄ້າ, ຕົວຢ່າງຄືອາເມລິກາລົງທຶນຕໍ່ຈີນສາມາດຊ່ວຍຈີນຍົກສູງລະດັບການພັດທະນາຂອງຂະແໜງການບໍລິການຕ່າງໆເຊັ່ນການທະນາຄານ, ການປະກັນໄພແລະອື່ນໆຕື່ມອີກ, ສ່ວນຈີນລົງທຶນຕໍ່ອາເມລິກາສາມາດຊ່ວຍອາເມລິກາສ້າງວຽກເຮັດງານທຳຫຼາຍກວ່າເກົ່າ.
ທ່ານຈາຄົບ ລູກ່າວວ່າ, ຍ້ອນໄດ້ພິຈາລະນາເຖິງຂະໜາດເສດຖະກິດແລະຜົນກະທົບຕໍ່ເສດຖະກິດໂລກຂອງອາເມລິກາກັບຈີນ, ທົ່ວໂລກໄດ້ສຸມສາຍຕາໃສ່ທ່າອ່ຽງຂອງການຮ່ວມມືດ້ານເສດຖະກິດການຄ້າລະຫວ່າງອາເມລິກາກັບຈີນ. ທ່ານເຫັນວ່າ, ການເຕີບໂຕດ້ານເສດຖະກິດຂອງໂລກໃນປັດຈຸບັນນີ້ອາດຈະບໍ່ແຂງແຮງຄືໄລຍະຜ່ານມາ, ແຕ່ວ່າປັດຈຸບັນເປັນການເຕີບໂຕແບບຍືນຍົງ, ໂດຍສະເພາະແມ່ນສະພາບການຂະຫຍາຍຕົວດ້ານເສດຖະກິດລະຫວ່າງອາເມລິກາກັບຈີນທີ່ຖືກຖືເປັນ "ເຄື່ອງຊ່ວຍຮັກສາຄວາມໝັ້ນທ່ຽງ" ຂອງການເຕີບໂຕດ້ານເສດຖະກິດໂລກໄດ້ມີຄວາມໝັ້ນທ່ຽງ.