ງານວາງສະແດງດອກໄມ້ແລະສວນຊື່ດັງຂອງສວນພືດສະຖາບັນວິທະຍາສາດຈີນຄັ້ງທີ 6 ໃນຫົວຂໍ້ "ດອກເຜິ້ງທຳມະຊາດ,ຂອງຂວັນຈາກທຳມະຊາດ"ໄດ້ຈັດຂຶ້ນຢູ່ສວນພືດສິບສອງພັ່ນນາແຂວງຢຸນນານໃນຫວ່າງກ່ອນນີ້ບໍ່ດົນ ເຊິ່ງເປັນງານວາງສະແດງພືດປະເພດດອກເຜິ້ງເຂດຮ້ອນນານາພັນທີ່ລວມເອົາການອະນຸລັກພືດ,ສິນລະປະການເຮັດສວນ,ວິທະຍາສາດແລະສິລະປະກຳ ໂດຍມີຈຸດປະສົງເພື່ອສົ່ງເສີມໃຫ້ປະຊາຊົນມີສ່ວນຮ່ວມເຂົ້າໃນການອະນຸລັກດອກເຜິ້ງໃຫ້ຫຼາຍກວ່າເກົ່າ.
ໃນນີ້, ຈຸດເດັ່ນຂອງງານວາງສະແດງຄັ້ງນີ້ຄືກິດຈະກຳສົ່ງດອກເຜິ້ງເຂົ້າບ້ານແລະດອກເຜິ້ງກັບຄືນສູ່ທຳມະຊາດ ເຊິ່ງມີຈຸດປະສົງເພື່ອຍົກສູງສະຕິອະນຸລັກດອກເຜິ້ງຂອງມວນຊົນເຂດຊຸມຊົນແລະສົ່ງເສີມໃຫ້ປະຊາຊົນພາກັນອະນຸລັກດອກເຜິ້ງ. ໃນພິທີເປີດງານວາງສະແດງດັ່ງກ່າວ, ຜູ້ຕາງໜ້າຊາວບ້ານບໍລິເວນໃກ້ຄຽງ 70 ຄົນໄດ້ສັນຍາຮັບພາລະການບົວລະບັດເບັ້ຍດອກເຜິ້ງທີ່ບົ່ງເພາະໂດຍສວນພືດສິບສອງພັ່ນນາ ແລະໃນຕໍ່ໜ້າ,ສວນພືດດັ່ງກ່າວຍັງຈະຈັດການຝຶກອົບຮົມຄວາມຮູ້ປູກແລະບົວລະບັດຄຸ້ມຄອງດອກເຜິ້ງໃຫ້ຊາວບ້ານ ທັງໃຫ້ການຊີ້ນຳແລະຕິດຕາມເປັນປະຈຳເພື່ອເພີ່ມທະວີການເຄື່ອນໄຫວອະນຸລັກດອກເຜິ້ງໃນຕົວຈິງຂອງຊາວບ້ານຄືປູກແລະອະນຸລັກຮັກສາດອກເຜິ້ງ ເພື່ອເຮັດໃຫ້ຊາວບ້ານມີລາຍຮັບເພີ່ມຂຶ້ນ.
ງານວາງສະແດງດອກໄມ້ແລະສວນຊື່ດັງລິເລີ່ມໂດຍຄະນະກຳມະການເຄືອຂ່າຍອິນເຕີເນັດນິຍົມວິທະຍາສາດສວນພືດສະຖາບັນວິທະຍາສາດຈີນ ເຊິ່ງຈຸດປະສົງກໍເພື່ອເກັບໂຮມແລະຮັກສາຊັບພະຍາກອນດອກໄມ້ແລະຕົ້ນໄມ້ຊື່ດັງທີ່ມີເອກະລັກສະເພາະ ທັງຍົກສູງສະຕິການມີສ່ວນຮ່ວມແລະອະນຸລັກຂອງມວນຊົນ.