ການແຫ່ຂະບວນປະທ້ວງທີ່ເອີ້ນວ່າ "ແຈ້ງສ່ວຍສາອາກອນ" ຂອງປະຊາຊົນອາເມລິກາໄດ້ເກີດຂຶ້ນຢູ່ນະຄອນນິວຢອກ, ນະຄອນຫຼວງວໍຊິງຕັນ ແລະ ຕົວເມືອງອື່ນໆ 150 ກວ່າຕົວເມືອງໃນວັນທີ 15 ເມສານີ້ຕາມເວລາທ້ອງຖິ່ນ ໂດຍກຸ່ມແຫ່ຂະບວນໄດ້ຮຽກຮ້ອງໃຫ້ທ່ານໂດນັນ ທຣຳ ປະທານາທິບໍດີຈົ່ງແຈ້ງບັນຊີການມອບສ່ວຍສາອາກອນຂອງຕົນ.
ເຄືອຂ່າຍຂ່າວໂທລະພາບເຄເບີນອາເມລິກາ ຫຼື CNN ລາຍງານໃນວັນທີ 16 ເມສານີ້ວ່າ, ຜູ້ສະໜັບສະໜູນທ່ານໂດນັນ ທຣຳ ແລະຜູ້ຄັດຄ້ານ ທັງໝົດຫຼາຍຮ້ອຍຄົນໄດ້ເກີດການປະທະກັນຢ່າງຮຸນແຮງ ຢູ່ເມືອງເບີເຄລີ ລັດກາລີຟໍເນຍ ສົ່ງຜົນເຮັດໃຫ້ 11 ຄົນໄດ້ຮັບບາດເຈັບ ໃນນີ້ມີ 7 ຄົນຖືກສົ່ງໄປປິ່ນປົວຢູ່ໂຮງໝໍ. ໃນເຫດການດັ່ງກ່າວ, ເຈົ້າໜ້າທີ່ຕຳຫຼວດໄດ້ຈັບຜູ້ກໍ່ເຫດ 21 ຄົນ, ຂະນະທີ່ລົດໄຟໃຕ້ດິນໃຈກາງເມືອງດັ່ງກ່າວກໍຈຳເປັນຕ້ອງປິດບໍລິການກວ່າ 3 ຊົ່ວໂມງໃນຕອນທ່ຽງວັນທີ 16 ເມສານີ້.
CNN ລາຍງານຕື່ມວ່າ, ເຈົ້າໜ້າທີ່ຕຳຫຼວດເບີເຄລີ ໄດ້ອອກຖະແຫຼງການວ່າ: ຜູ້ສະໜັບສະໜູນທ່ານທຣຳ ໄດ້ຊຸມນຸມ "ວັນຜູ້ຮັກຊາດ" ໃນຕອນທ່ຽງວັນດັ່ງກ່າວ ແລະໄດ້ປະທະກັນກັບຜູ້ຄັດຄ້ານທີ່ກຳລັງປະທ້ວງຢູ່ບໍລິເວນນັ້ນ. ໃນລາຍການໂທລະພາບໄດ້ເຜີຍພາບຫຼາຍຄົນໄດ້ຮັບບາດເຈັບ, ບາງຄົນເລືອດໄຫຼລົງຈາກຫົວ ເຫັນໄດ້ຄວາມຮ້າຍແຮງຂອງເຫດການ.