ທ່ານຣີເຄັບ ເຕຢິບ ເອີໂດກັນ ປະທານາທິບໍດີຕວກກີໄດ້ປະກາດໃນກາງຄືນວັນທີ 16 ເມສານີ້ວ່າ: ຮ່າງຍັດຕິປັບປຸງລັດຖະທຳມະນູນທີ່ສະເໜີໂດຍພັກທ່ຽງທຳແລະພັດທະນາ ເຊິ່ງເປັນພັກກຳອຳນາດ ພ້ອມດ້ວຍຜູ້ສະໜັບສະໜູນ ສາມາດຜ່ານຮັບຮອງໃນການເອົາປະຊາມະຕິໃນມື້ດຽວກັນ, ຂະນະທີ່ຕົນຈະຖືການຟື້ນຟູການລົງໂທດປະຫານຊີວິດເປັນວຽກງານສຳຄັນທີ່ສຸດ.
ທ່ານເອີໂດກັນ ໄດ້ເວົ້າຕໍ່ນັກຂ່າວຢູ່ເມືອງອິສຕານບຸນ ວ່າ: ຝ່າຍສະໜັບສະໜູນຮ່າງຍັດຕິ ໄດ້ 25 ລ້ານບັດ ຫຼາຍກວ່າຝ່າຍຄັດຄ້ານ 1 ລ້ານ 3 ແສນບັດ. ທ່ານກ່າວຕື່ມວ່າ: ຕວກກີໄດ້ "ທຳການຕົກລົງຄັ້ງປະຫວັດສາດ" ກ່ຽວກັບໂຄງປະກອບການປົກຄອງປະເທດ, ຂະນະທີ່ປະເທດທີ່ຕວກກີຖືເປັນພັນທະມິດຄວນເຄົາລົບການຕົກລົງດັ່ງກ່າວ.
ການເອົາປະຊາມະຕິເທື່ອນີ້ໄດ້ກ່ຽວພັນເຖິງການດັດແກ້ລັດຖະທຳມະນູນ 18 ບ່ອນ ໃນນີ້ມາດຕາທີ່ມີຄວາມຂັດແຍ້ງທີ່ສຸດກໍຄື ປ່ຽນລະບອບການເມືອງຂອງສາທາລະນະລັດຕວກກີ ຈາກລະບອບລັດຖະສະພາ ມາເປັນລະບອບປະທານາທິບໍດີ ຂະນະທີ່ການດັດແກ້ລັດຖະທຳມະນູນເທື່ອນີ້ຈະສົ່ງຜົນເຮັດໃຫ້ປະທານາທິບໍດີມີສິດອຳນາດຫຼາຍກວ່າເກົ່າ.