ແຕ່ປີ 2016 ເປັນຕົ້ນມາ, ລັດຖະບານໄດ້ກຳນົດເອົາວັນທີ 24 ເມສາຂອງແຕ່ລະປີເປັນ "ວັນການບິນອະວະກາດຈີນ".ແລະໃນປີນີ້ໄດ້ຖື "ການບິນອະວະກາດສ້າງຊີວິດການເປັນຢູ່ທີ່ສວຍສົດງົດງາມ"ເປັນຫົວຂໍ້ ແລະຈະຈັດກິດຈະກຳຫຼັກຢູ່ເມືອງຊີ່ອ່ານທີ່ເປັນເມືອງເກົ່າແກ່ຂອງຈີນໃນທ້າຍເດືອນເມສານີ້.
ທ່ານ ທຽນຢູ້ຫຼົງ ຫົວໜ້າວິສະວະກອນກົມວິທະຍາສາດວິສະວະກຳປ້ອງກັນປະເທດ, ເລຂາທິການໃຫຍ່ກົມການບິນອະວະກາດແຫ່ງຊາດຈີນໄດ້ໃຫ້ຮູ້ວ່າ: ການຈັດ"ວັນການບິນອະວະກາດຈີນ" ໃນປີນີ້ກໍເພື່ອສຸມໃສ່ນຳໃຊ້ອະວະກາດ ແລະເສີມຂະຫຍາຍບົດບາດຂອງການບິນອະວະກາດໃນການອຳນວຍຄວາມສະດວກໃນການສ້າງເສດຖະກິດແຫ່ງຊາດແລະການພັດທະນາສັງຄົມຈີນ, ຊຸກຍູ້ໃຫ້ວຽກງານການບິນອະວະກາດກ້າວມາສູ່ສະໜາມຮົບຂອງການສ້າງເສດຖະກິດແຫ່ງຊາດຕື່ມອີກ,ເພື່ອສ້າງຄວາມສົມບູນພູນສຸກໃຫ້ແກ່ປະຊາຊົນ, ນຳເອົາຜົນປະໂຫຍດມາໃຫ້ແກ່ປະຊາຊົນແລະສ້າງຊີວິດການເປັນຢູ່ທີ່ສົດໃສ.
ໃນໄລຍະກິດຈະກຳ,ຈະຈັດກອງປະຊຸມສະຫະພັນປະດິດສ້າງໃໝ່ການບິນອະວະກາດ "ໜຶ່ງແລວທາງໜຶ່ງເສັ້ນທາງ", ກອງປະຊຸມສະພາມົນຕີສະຫະພັນປະດິດສ້າງໃໝ່ວິທະຍາສາດເຕັກໂນໂລຊີການບິນອະວະກາດຄັ້ງທີ 1 , ກອງປະຊຸມເວທີປຶກສາຫາລືການປະສົມປະສານລະຫວ່າງການພັດທະນາການທະຫານແລະພົນລະເຮືອນແລະອື່ນໆ. ນອກນີ້, ຍັງມີກວ່າ 200 ກິດຈະກຳຈະຈັດຂຶ້ນໃນທົ່ວປະເທດຈີນໃນໄລຍະດຽວກັນ.