ກົມຄຸ້ມຄອງຄົນເຂົ້າເມືອງມາເລເຊຍຢືນຢັນໃນວັນທີ 18 ເມສານີ້ວ່າ: ໃນໜຶ່ງອາທິດຜ່ານມາ, ມີພົນລະເມືອງສປປ ເກົາຫຼີ 296 ຄົນທີ່ພັກກາຍກຳນົດຢູ່ປະເທດຕົນໄດ້ເຂົ້າລາຍງານຕໍ່ພະແນກຄຸ້ມຄອງຄົນເຂົ້າເມືອງລັດຊາຣາວັກ ແລະຂະນະດຽວກັນກໍຈະສົ່ງຄົນເຫຼົ່ານີ້ກັບຄືນສປປ ເກົາຫຼີໂດຍແບ່ງເປັນແຕ່ລະຊຸດ.
ໃນຖະແຫຼງການສະບັບໜຶ່ງຂອງກົມຄຸ້ມຄອງຄົນເຂົ້າເມືອງມາເລເຊຍໄດ້ລະບຸວ່າ: ຊາວສປປ ເກົາຫຼີເຫຼົ່ານີ້ສ່ວນໃຫຍ່ເປັນຜູ້ຂາຍແຮງງານ ແລະເນື່ອງຈາກວ່າໄລຍະນີ້ມາເລເຊຍໄດ້ຍົກເລີກນະໂຍບາຍຍົກເວັ້ນວີຊາເຂົ້າເມືອງຂອງພົນລະເມືອງສປປ ເກົາຫຼີຈິ່ງເຮັດໃຫ້ເກີດການພັກກາຍກຳນົດ. ຖະແຫຼງການລະບຸຕື່ມວ່າ: ພົນລະເມືອງສປປ ເກົາຫຼີຍັງຈະຖືກສົ່ງກັບຄືນປະເທດໂດຍແບ່ງເປັນແຕ່ລະຊຸດ, ແຕ່ບໍ່ໄດ້ບອກວ່າການສົ່ງພົນລະເມືອງສປປ ເກົາຫຼີກັບຄືນປະເທດນັ້ນຈະສິ້ນສຸດໃນມື້ໃດ.
ເລີ່ມແຕ່ວັນທີ 6 ມີນາເປັນຕົ້ນມາ, ມາເລເຊຍໄດ້ຍົກເລີກນະໂຍບາຍຍົກເວັ້ນວີຊາຂອງພົນລະເມືອງສປປເກົາຫຼີທີ່ເຂົ້າປະເທດຕົນໂດຍອ້າງເພື່ອຄວາມໝັ້ນຄົງແຫ່ງຊາດຂະນະທີ່ກ່ອນໜ້ານີ້, ທັງສອງປະເທດໄດ້ຍົກເວັ້ນວິຊາໃຫ້ແກ່ພົນລະເມືອງຂອງກັນແລະກັນ.