ເຈົ້າໜ້າທີ່ທະຫານປາກິສຖານ ໄດ້ອອກຖະແຫຼງການໃນວັນທີ 19 ເມສານີ້ວ່າ ທ່ານຄາມາ ຈາເວັດ ບັດວາ ຫົວໜ້າເສນາທິການກອງທັບບົກປະເທດຕົນ ໄດ້ລົງນາມໃນຄຳສັ່ງສັງຫານຜູ້ກໍ່ການຮ້າຍ 30 ຄົນ.
ຖະແຫຼງການລະບຸວ່າ: ຜູ້ກໍ່ການຮ້າຍເຫຼົ່ານີ້ໄດ້ເຂົ້າໂຈມຕີໂຮງຮຽນສະເພາະລູກຫຼານທະຫານເປຊາວາ ທັງລັກພາຕົວ, ເຂັ່ນຂ້າປະຊາຊົນແລະເຈົ້າໜ້າທີ່ກຳລັງປະກອບອາວຸດ, ພ້ອມທັງຫຼອນໂຈມຕີສະໜາມບິນແຫ່ງໜຶ່ງທີ່ຢູ່ຮ່ອມພູສະວັດ.
ທັງນີ້ ເມື່ອວັນທີ 16 ທັນວາປີ 2014, ກຸ່ມປະກອບອາວຸດກຸ່ມໜຶ່ງໄດ້ແຕ່ງຕົວເປັນທະຫານ ແລະຫຼອນໂຈມຕີໂຮງຮຽນສະເພາະລູກຫຼານທະຫານແຫ່ງໜຶ່ງຢູ່ເປຊາວາ ເຮັດໃຫ້ 150 ຄົນເສຍຊີວິດ. ຈາກນັ້ນມາ, ກຸ່ມຕາລີບັນປາກິສຖານ ກໍໄດ້ກ່າວອ້າງຄວາມຮັບຜິດຊອບຕໍ່ເຫດການດັ່ງກ່າວ. ຫຼັງເກີດເຫດໂສກນາດຕະກຳດັ່ງກ່າວ, ລັດຖະບານປາກິສຖານ ໄດ້ປະກາດມາດຕະການຕ້ານລັດທິກໍ່ການຮ້າຍໃນຮູບແບບຕ່າງໆ ລວມທັງໄດ້ສ້າງຕັ້ງສານທະຫານພິເສດ ເພື່ອເພີ່ມກຳລັງປາບປາມນາບຂູ່ຕໍ່ລັດທິກໍ່ການຮ້າຍ. ຂະນະທີ່ໃນເດືອນມີນາຜ່ານມາ, ລັດຖະສະພາປາກິສຖານໄດ້ຮັບຮອງມະຕິ ໂດຍໃຫ້ສານທະຫານພິເສດນີ້ສືບຕໍ່ປະຕິບັດໜ້າທີ່ໄປອີກ 2 ປີ.
