ທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນໄດ້ປະກາດໃນວັນທີ 19 ເມສານີ້ວ່າ ໄດ້ໃຫ້ເງິນລາງວັນ 1 ລ້ານເປໂຊ ຫຼື ປະມານ 21.200 ໂດລາສະຫະລັດຕໍ່ຄົນທີ່ສາມາດນຳຈັບ ຫຼື ສັງຫານຜູ້ປະກອບອາວຸດອາບູຊາຢັບ 6 ຄົນທີ່ເຈຕະນາເຄື່ອນໄຫວກໍ່ການຮ້າຍຢູ່ເກາະໂບໂຮນ.
ວັນທີ 11 ເມສານີ້ ຜູ້ປະກອບອາວຸດກຸ່ມໜຶ່ງ ໄດ້ຂີ່ເຮືອຂຶ້ນບົກເກາະໂບໂຮນ ແຫຼ່ງທ່ອງທ່ຽວທີ່ມີຊື່ສຽງ ທາງພາກກາງຟິລິບປິນ ແລະເຈຕະນາກໍ່ການຮ້າຍ, ແຕ່ປະຊາຊົນທ້ອງຖິ່ນໄດ້ພົບເຫັນກ່ອນທັງໄດ້ລາຍງານເຈົ້າໜ້າທີ່ຕຳຫຼວດ. ຂະນະທີ່ເກາະໂບໂຮນແມ່ນສະຖານທີ່ທ່ອງທ່ຽວທີ່ສຳຄັນຂອງປະເທດດັ່ງກ່າວ ແລະ ອາຊຽນກໍຈະດຳເນີນກອງປະຊຸມຢູ່ເກາະດັ່ງກ່າວໃນອາທິດນີ້ ເພື່ອຫາລືການຮ່ວມມືການຄ້າໃນພາກພື້ນ ຄາດວ່າຈະມີຄະນະຜູ້ແທນບັນດາປະເທດໃນອາຊຽນກວ່າ 200 ທ່ານເຂົ້າຮ່ວມ. ຈາກນີ້, ລັດຖະບານຟິລິບປິນຈຶ່ງໄດ້ເພີ່ມທະວີການຮັກສາຄວາມສະຫງົບປອດໄພ ເພື່ອຮັບປະກັນໃຫ້ກອງປະຊຸມດຳເນີນໄປຢ່າງປອດໄພດີ.
