ກອງປະຊຸມເຈລະຈາຍຸດທະສາດລະດັບສູງຈີນ-ເອີຣົບຄັ້ງທີ 7 ໄດ້ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນໃນວັນທີ 19 ເມສານີ້ ໂດຍທ່ານ ຢາງເຈສື້ ທີ່ປຶກສາແຫ່ງລັດຈີນ ແລະ ທ່ານນາງ ຟີເດີຣີຄາ ໂມເກຣີນີ ຜູ້ຕາງໜ້າລະດັບສູງດ້ານນະໂຍບາຍການຕ່າງປະເທດແລະຄວາມໝັ້ນຄົງຂອງສະຫະພາບເອີຣົບທັງເປັນຮອງປະທານຄະນະກຳມະການສະຫະພາບເອີຣົບເປັນປະທານຮ່ວມ.
ໃນການເຈລະຈາດັ່ງກ່າວ,ເອີຣົບໄດ້ສະໜັບສະໜູນແລະພ້ອມເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ທີ່ຈີນຈັດຕັ້ງຂຶ້ນ. ຂະນະດຽວກັນສອງຝ່າຍກໍເນັ້ນວ່າຈະເລັ່ງຂະບວນການກະກຽມຢ່າງສ້າງສັນໂດຍໄວ ເພື່ອຮັບປະກັນໃຫ້ການພົບປະເຈລະຈາລະຫວ່າງຜູ້ນຳຈີນແລະສະຫະພາບເອີຣົບຄັ້ງທີ 19 ປະສົບຜົນສຳເລັດ.
ນອກນີ້,ສອງຝ່າຍຍັງເຫັນດີຈະເພີ່ມທະວີການພົວພັນແລະປະສານງານໃນບັນຫາໂລກ, ສືບຕໍ່ຊຸກຍູ້ການປັບປຸງການຄຸ້ມຄອງໂລກໃຫ້ດີຂຶ້ນ, ນຳພາຍຸກໂລກາພິວັດໃຫ້ພັດທະນາໄປຕາມທິດກວມລວມ,ດຸ່ນດ່ຽງແລະຍືນຍົງ. ທັງຍິນດີຮ່ວມກັນສຸມທຸກຄວາມພະຍາຍາມຊຸກຍູ້ກອງປະຊຸມສຸດຍອດຮຳເບີກຜູ້ນຳກຸ່ມ 20 ປະເທດໃຫ້ໄດ້ຮັບຄວາມຄືບໜ້າໃໝ່ບົນພື້ນຖານກອງປະຊຸມສຸດຍອດຮາງໂຈ່ວເມື່ອປີຜ່ານມາ. ຂະນະດຽວກັນກໍເຫັນດີຮ່ວມກັນຊຸກຍູ້ການຈັດຕັ້ງປະຕິບັດສັນຍາປາຣີກ່ຽວກັບການປ່ຽນແປງຂອງດິນຟ້າອາກາດ, ຊຸກຍູ້ການຈັດຕັ້ງປະຕິບັດວາລະກອງປະຊຸມການພັດທະນາແບບຍືນຍົງປີ 2030ແລະເພີ່ມທະວີການຮ່ວມມືໃນຂົງເຂດຄວາມໝັ້ນຄົງຕື່ມອີກ.