ຕາມຂ່າວສານຈີນ: ທ່ານຫຼິວຢິງ ຮອງຫົວໜ້າຄະນະກຳມະການພັດທະນາແລະປະຕິຮູບແຂວງຢຸນນານໄດ້ເປີດເຜີຍໃນກອງປະຊຸມສົ່ງເສີມການຮ່ວມມືດ້ານຄວາມສາມາດການຜະລິດສາກົນແຂວງຢຸນນານທີ່ຈັດຂຶ້ນໃນວັນທີ 19 ເມສານີ້ວ່າ, ຈາກຄວາມພະຍາຍາມຮ່ວມຂອງຝ່າຍຕ່າງໆ, ການຮ່ວມມືດ້ານຄວາມສາມາດການຜະລິດລະຫວ່າງແຂວງຕົນກັບປະເທດ "ໜຶ່ງແລວທາງໜຶ່ງເສັ້ນທາງ" ໄດ້ຮັບໝາກຜົນໃນເບື້ອງຕົ້ນ.
ທ່ານຫຼິວຢິງກ່າວຕື່ມວ່າ, ໃນຫຼາຍປີມໍ່ໆມານີ້, ແຂວງຢຸນນານໄດ້ຕັ້ງໜ້າຊຸກຍູ້ການຮ່ວມມືດ້ານຄວາມສາມາດການຜະລິດກັບປະເທດ "ໜຶ່ງແລວທາງໜຶ່ງເສັ້ນທາງ" ໂດຍມາຮອດທ້າຍປີ 2016, ມີ 680 ວິສາຫະກິດຂອງແຂວງຕົນໄປລົງທຶນຢູ່ຕ່າງປະເທດ ແລະມີມູນຄ່າການລົງທຶນເຖິງ 7 ຕື້ 400 ລ້ານໂດລາ.
ປັດຈຸບັນ, ແຂວງຢຸນນານໄດ້ຮ່ວມມືດ້ານຄວາມສາມາດການຜະລິດກັບຫຼາຍປະເທດ ເຊັ່ນ: ລາວ, ມຽນມາ, ຫວຽດນາມ, ບັງກຣາເດັດ, ກຳປູເຈຍ ແລະອື່ນໆ. ໃນນັ້ນ, ສູນການຄ້າວຽງຈັນເຊັນເຕີ, ເຂດພັດທະນາກວມລວມໄຊເສດຖາ, ໂຄງການອາລຸຍນຽມ 1 ລ້ານໂຕນຕໍ່ປີຂອງລາວ ແລະອີກຫຼາຍໆໂຄງການລ້ວນແຕ່ເຂົ້າສູ່ໄລຍະປະຕິບັດຕົວຈິງແລ້ວ. ສະໜາມບິນອັງກໍເມືອງຊຽມລຽບປະເທດກຳປູເຈຍ, ເຂດອຸດສາຫະກຳເຂດເສດຖະກິດພິເສດ ແລະທ່າກຳປັ່ນນ້ຳເລິກເມືອງຄິວພິວປະເທດມຽນມາ ແລະອີກຫຼາຍໂຄງການກໍໄດ້ຈັດຕັ້ງປະຕິບັດຢ່າງສະດວກ.