ຫ້ອງການຄຸ້ມຄອງລະບົບນຳທາງດາວທຽມຈີນ ແລະ ສູນວິທະຍາສາດເຕັກນິກເຈົ້າຊີວິດອາມັດ ບິນ ອັບດູລາ ອາຊິສຊາອຸດິ ອາຣາບີ ໄດ້ເປັນເຈົ້າພາບຮ່ວມຈັດການສຳມະນາກ່ຽວກັບລະບົບນຳທາງດາວທຽມ "ເປີຍໂຕວ" ຢູ່ນະຄອນຫຼວງລີຢັດ ແຕ່ວັນທີ 18-19 ເມສານີ້ ແລະຖືວ່າເປັນຄັ້ງທຳອິດທີ່ລະບົບນຳທາງດາວທຽມ "ເປີຍໂຕວ" ຈີນບຸກຕະຫຼາດປະເທດດັ່ງກ່າວຫຼັງມີຄວາມຕ້ອງການນຳໃຊ້ຜະລິດຕະພັນນຳທາງຢ່າງຫຼວງຫຼາຍ.
ທ່ານເຕີກີ ອານ-ຟາຍຊາວ ຫົວໜ້າສູນວິທະຍາສາດເຕັກນິກເຈົ້າຊີວິດອາມັດ ບິນ ອັບດູລາ ອາຊິສ ກ່າວໃນການສຳມະນາດັ່ງກ່າວວ່າ: ການຮ່ວມມືກັບຈີນໃນລະບົບເຕັກໂນໂລຊີການນຳທາງດາວທຽມຈະເສີມຂະຫຍາຍບົດບາດສຳຄັນຕໍ່ປະເທດຕົນເພື່ອບັນລຸການຫັນປ່ຽນຮູບແບບເສດຖະກິດ ແລະ "ວິໄສທັດປີ 2030" ພ້ອມທັງຊຸກຍູ້ການພັດທະນາໃນຂົງເຂດຕ່າງໆເປັນຕົ້ນ ການຄົ້ນຄວ້າວິທະຍາສາດ, ອຸດສາຫະກຳ, ການຄ້າ, ການຄົມມະນາຄົມ, ກະສິກຳ, ພະລັງງານ, ການບິນພົນລະເຮືອນ, ພື້ນທີ່ທາງພູມສາດ ແລະອື່ນໆ.
