ກອງປະຊຸມເຈົ້າໜ້າທີ່ປະສານງານກອງປະຊຸມສຸດຍອດທຸລະກິດແລະການລົງທຶນຈີນ-ອາຊຽນຄັ້ງທີ 14 ໄດ້ຈັດຂຶ້ນຢູ່ເມືອງໜານໜິງ ສປ ຈີນໃນວັນທີ 20 ເມສານີ້ ໂດຍເຈົ້າໜ້າທີ່ຈີນແລະ 10 ປະເທດອາຊຽນໄດ້ປຶກສາຫາລືກັນ ໂດຍປິ່ນອ້ອມ "ຮ່ວມກັນສ້າງເສັ້ນທາງສາຍໄໝທາງທະເລໃນສະຕະວັດທີ 21 ແລະຊຸກຍູ້ການເຊື່ອມໂຍງເຂົ້າກັນຂອງເສດຖະກິດພາກພື້ນໂດຍຜ່ານການທ່ອງທ່ຽວ" ທີ່ເປັນຫົວຂໍ້ກອງປະຊຸມສຸດຍອດຄັ້ງນີ້.
ທ່ານເສິນໂຈວ ຮອງປະທານສະມາຄົມສົ່ງເສີມການຄ້າແລະການລົງທຶນຈີນກ່າວວ່າ, ປີ 2017 ເປັນປີຮ່ວມມືທ່ອງທ່ຽວຈີນ-ອາຊຽນ ເຊິ່ງສອງຝ່າຍຈະຊຸກຍູ້ການຮ່ວມມືດ້ານການທ່ອງທ່ຽວຕາມມາດຕະການຕ່າງໆ ເພື່ອເຮັດໃຫ້ນັກທ່ອງທ່ຽວຈີນທີ່ໄປທ່ຽວຕ່າງປະເທດບັນລຸເຖິງ 700 ລ້ານເທື່ອຄົນໃນ 5 ປີຕໍ່ໜ້າ. ປັດຈຸບັນ, ຈີນໄດ້ກາຍເປັນແຫຼ່ງນັກທ່ອງທ່ຽວໃຫຍ່ທີ່ສຸດຂອງຕະຫຼາດທ່ອງທ່ຽວອາຊຽນ ແລະການຮ່ວມມືດ້ານການທ່ອງທ່ຽວລະຫວ່າງຈີນກັບອາຊຽນຈະມີອະນາຄົດທີ່ສົດໃສ.
ທ່ານທະນົງສິນ ກັນລະຍາ ຮອງປະທານສະພາອຸດສາຫະກຳແລະການຄ້າແຫ່ງຊາດລາວກ່າວວ່າ, ຂະແໜງການທ່ອງທ່ຽວມີຄວາມໝາຍສຳຄັນທີ່ສຸດຕໍ່ບັນດາປະເທດອາຊຽນ ແລະນັກທ່ອງທ່ຽວຈີນໄປທ່ຽວອາຊຽນໄດ້ປະກອບສ່ວນເຂົ້າໃນການພັດທະນາເສດຖະກິດທ່ອງທ່ຽວຂອງຫຼາຍປະເທດໄດ້ຢ່າງຫຼວງຫຼາຍ. ໃນອະນາຄົດ, ສອງປະເທດຈີນແລະລາວຄວນເພີ່ມທະວີການຮ່ວມມືດ້ານການທ່ອງທ່ຽວ ຄື ໃຫ້ຄວາມສຳຄັນຕໍ່ການພັດທະນາຊັບພະຍາກອນມະນຸດດ້ານການທ່ອງທ່ຽວ ແລະການປັບປຸງສິ່ງກໍ່ສ້າງດ້ານການທ່ອງທ່ຽວໃຫ້ດີຂຶ້ນ ເພື່ອຊຸກຍູ້ການຮ່ວມມືລະຫວ່າງສອງຝ່າຍຂະຫຍາຍຕົວຢ່າງຕໍ່ເນື່ອງ.
 |
