ກອງປະຊຸມລັດຖະມົນຕີກະຊວງການເງິນແລະຜູ້ວ່າການທະນາຄານກາງຂອງກຸ່ມ 20 ປະເທດ ຫຼື G20 ໄດ້ຈັດຂຶ້ນຢູ່ນະຄອນຫຼວງວໍຊິງຕັນປະເທດອາເມລິກາໃນວັນທີ 20-21 ເມສານີ້, ໂດຍຕົ້ນຕໍປຶກສາຫາລືກັນກ່ຽວກັບສະຖານະການແລະໂຄງຮ່າງການເຕີບໂຕຂອງເສດຖະກິດໂລກໃນປັດຈຸບັນ, ໂຄງປະກອບການເງິນສາກົນແລະການຄຸ້ມຄອງການທະນາຄານທົ່ວໂລກ, ຊຸກຍູ້ຂໍ້ລິເລີ່ມການລົງທຶນຢູ່ອາຟຼີກາ, ການພັດທະນາແລະຕິດຕາມຄຸ້ມຄອງພາກສ່ວນການທະນາຄານ ແລະອື່ນໆ. ທ່ານສ່ຽວເຈ ລັດຖະມົນຕີກະຊວງການເງິນຈີນແລະທ່ານໂຈ່ວສຽວຊ່ວນ ຜູ້ວ່າການທະນາຄານປະຊາຊົນຈີນໄດ້ນຳພາຄະນະຜູ້ແທນເຂົ້າຮ່ວມກອງປະຊຸມດັ່ງກ່າວ.
ທ່ານສ່ຽວເຈກ່າວວ່າ, ນັບແຕ່ປີນີ້ເປັນຕົ້ນມາ, ປັດໄຈອັນຕັ້ງໜ້າໃນການພັດທະນາເສດຖະກິດຈີນໄດ້ເພີ່ມຂຶ້ນຕື່ມອີກ, ໃນໄຕມາດທຳອິດຂອງປີນີ້ ເສດຖະກິດຈີນໄດ້ເພີ່ມຂຶ້ນ6.9% ເມື່ອທຽບໃສ່ໄລຍະດຽວກັນຂອງປີຜ່ານມາ. ແນວໃດກໍດີ, ຈີນມີຄວາມໝັ້ນໃຈຕໍ່ການບັນລຸເປົ້າໝາຍທີ່ເສດຖະກິດຈະເພີ່ມຂຶ້ນປະມານ 6.5% ໃນປີນີ້, ເຊິ່ງຈະປະກອບສ່ວນຫຼາຍກວ່າເກົ່າເຂົ້າໃນການເຕີບໂຕຂອງເສດຖະກິດໂລກ.
ທ່ານໂຈ່ວສຽວຊ່ວນກ່າວເນັ້ນວ່າ, ການພັດທະນາການທະນາຄານສີຂຽວມີຄວາມໝາຍສຳຄັນ, ມີຜົນດີຕໍ່ການເພີ່ມທະວີການພັດທະນາເສດຖະກິດແບບຍືນຍົງໂດຍຜ່ານການຫຼຸດຕົ້ນທຶນການທົດແທນໃນອະນາຄົດໃຫ້ໜ້ອຍລົງ; ຊຸກຍູ້ໃຫ້ຊັບພະຍາກອນການເງິນໃຊ້ໃນດ້ານການອະນຸລັກສິ່ງແວດລ້ອມຫຼາຍກວ່າ, ເພີ່ມຄວາມສາມາດຕ້ານຄວາມສ່ຽງຂອງທົ່ວສັງຄົມ; ຄະນະດຽວກັນ ກໍຈະຊ່ວຍໃຫ້ວິສາຫະກິດການທະນາຄານສາມາດຮັບມືກັບຄວາມສ່ຽງດ້ານສິ່ງແວດລ້ອມແລະອຳນວຍໂອກາດການຄ້າໃຫ້ຂະເຈົ້າພ້ອມ. ສະນັ້ນ ໃນທົ່ວໂລກມີຫຼາຍປະເທດໄດ້ຕັ້ງໜ້າເຫັນດີຂໍ້ລິເລີ່ມການທະນາຄານສີຂຽວ, ສົ່ງຜົນເຮັດໃຫ້ຍອດຈຳນວນການລະດົມທຶນໃນຕະຫຼາດຫຼັກຊັບສີຂຽວທົ່ວໂລກໃນປີຜ່ານມາໄດ້ເພີ່ມຂຶ້ນ 1 ເທົ່າ.
ຂະນະທີ່ທ່ານສ່ຽວເຈກ່າວຕື່ມວ່າ, ປີນີ້ G20 ຊຸກຍູ້ຂໍ້ລິເລີ່ມການລົງທຶນຢູ່ອາຟຼີກາແລະໄດ້ຄືບໜ້າເປັນຢ່າງດີ ເຊິ່ງເປັນໝາກຜົນສຳຄັນຢ່າງໜຶ່ງໃນວາລະປະຊຸມການເງິນການທະນາຄານຂອງ G20 ໃນປີນີ້, ຈີນໄດ້ສະແດງຄວາມຊົມເຊີຍຕໍ່ໝາກຜົນດັ່ງກ່າວ. ຂະນະທີ່ບັນດາປະເທດໃນ G20 ຄວນເພີ່ມທະວີການຮ່ວມມືສັງລວມກັບປະເທດໃນອາຟຼີກາ ພະຍາຍາມບັນລຸເປົ້າໝາຍທີ່ຕ່າງຝ່າຍຕ່າງມີຜົນປະໂຫຍດ, ຮ່ວມກັນປະກອບສ່ວນເຂົ້າໃນການເຕີບໂຕແບບຍືນຍົງແລະກວມລວມຂອງເສດຖະກິດອາຟຼີກາ ກໍຄືຂອງໂລກ.