ຕາມເວັບໄຊກະຊວງການຕ່າງປະເທດຈີນ: ທ່ານຫຼິວເຈິ້ນໝິງ ຮອງລັດຖະມົນຕີກະຊວງການຕ່າງປະເທດຈີນໄດ້ພົບປະເຈລະຈາກັບທ່ານນາງຄຳເພົາ ເອີນທະວັນ ຮອງລັດຖະມົນຕີກະຊວງການຕ່າງປະເທດລາວ ຢູ່ນະຄອນຫຼວງປັກກິ່ງ ໃນວັນທີ 21 ເມສາຜ່ານມານີ້.
ສອງຝ່າຍໄດ້ແລກປ່ຽນຄວາມເຫັນກ່ຽວກັບການພົວພັນຈີນ-ລາວ ແລະເຫັນດີປະສານສົມທົບກັນຢ່າງແໜ້ນແຟ້ນ ເພື່ອປະຕິບັດຕາມຄວາມເປັນເອກະພາບລະຫວ່າງຜູ້ນຳຂັ້ນສູງຂອງສອງປະເທດ ແລະກະກຽມໃຫ້ແກ່ທ່ານບຸນຍັງ ວໍລະຈິດ ປະທານປະເທດລາວທີ່ຈະມາເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນກ່ຽວກັບ "ໜຶ່ງແລວທາງໜຶ່ງເສັ້ນທາງ", ເພີ່ມທະວີການເຊື່ອມຕໍ່ດ້ານຍຸດທະສາດການພັດທະນາ, ຊຸກຍູ້ໂຄງການເສັ້ນທາງລົດໄຟຈີນ-ລາວແລະໂຄງການຮ່ວມມືອື່ນໆໃຫ້ຂະຫຍາຍຕົວຢ່າງໜັກແໜ້ນ, ເລັ່ງປະຕິບັດໂຄງການທີ່ຈີນຊ່ວຍເຫຼືອໃນຂົງເຂດປັບປຸງຊີວິດການເປັນຢູ່ຂອງປະຊາຊົນລາວ ແລະຮັດແໜ້ນການຮ່ວມມືລະຫວ່າງກະຊວງການຕ່າງປະເທດຂອງສອງປະເທດ.
ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບບັນຫາສາກົນແລະພາກພື້ນທີ່ສົນໃຈຮ່ວມກັນ ແລະເຫັນດີເພີ່ມທະວີການປະສານສົມທົບພາຍໃຕ້ຂອບຈີນ-ອາຊຽນ ແລະຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ.
 |
