ເພື່ອລະນຶກຄວາມກ້າວໜ້າແລະການພັດທະນາຂອງວຽກງານການບິນອະວະກາດ, ຈີນໄດ້ກຳນົດໃນປີກາຍນີ້ວ່າ ວັນທີ 24 ເມສາ ໃຫ້ເປັນ "ວັນການບິນອະວະກາດຈີນ". ສ່ວນຫົວຂໍ້ຂອງປີນີ້ແມ່ນ "ການບິນອະວະກາດສ້າງຊີວິດທີ່ງົດງາມ" ໂດຍຫຼາຍທ້ອງຖິ່ນພວມຈັດກິດຈະກຳຢ່າງຫຼວງຫຼາຍທີ່ສຸມໃສ່ເຕັກນິກແລະການປະຍຸກການບິນອະວະກາດ ແລະສະແດງບົດບາດຂອງການບິນອະວະກາດໃນການຮັບໃຊ້ການສ້າງສາເສດຖະກິດແຫ່ງຊາດແລະພັດທະນາສັງຄົມ.
ກິດຈະກຳຫຼັກຂອງວັນການບິນອະວະກາດຈີນປີນີ້ ໄດ້ຈັດຂຶ້ນຢູ່ເມືອງຊີ່ອ່ານ ເທດສະບານແຂວງສານຊີ່ ໂດຍໄດ້ຈັດງານວາງສະແດງວິທະຍາສາດແລະເວທີປຶກສາຫາລືດ້ານການບິນອະວະກາດຢ່າງເປັນລະບົບ ເພື່ອສະແດງຄວາມຄືບໜ້າຫຼ້າສຸດຂອງການບິນອະວະກາດຈີນຕໍ່ປະຊາຊົນ.
ທັງນີ້ ເຕັກນິກວິທະຍາສາດການບິນອະວະກາດຈີນ ພວມເສີມຂະຫຍາຍບົດບາດທີ່ນັບມື້ນັບສຳຄັນໃນການຊຸກຍູ້ການພັດທະນາເສດຖະກິດແຫ່ງຊາດ-ສັງຄົມ, ເຊິ່ງມາຮອດປັດຈຸບັນ, ມີຜູ້ນຳໃຊ້ໃນການຖ່າຍທອດສົດຂອງໂທລະພາບຜ່ານດາວທຽມ ໄດ້ຫຼາຍກວ່າ 70 ລ້ານຊຸດ, ເຄື່ອງເທີມີໂນ "ເປີຍໂຕ" ມີຫຼາຍກວ່າ 4 ລ້ານຊຸດ, ການປະຍຸກດາວທຽມສ້າງມູນຄ່າການຜະລິດ ໄດ້ຫຼາຍກວ່າ 200 ຕື້ຢວນຕໍ່ປີ.