ທ່ານ ເກີງສວງ ໂຄສົກກະຊວງການຕ່າງປະເທດຈີນ ປະກາດໃນກອງປະຊຸມຂ່າວທີ່ຈັດຂຶ້ນໃນວັນທີ 24 ເມສານີ້ວ່າ, ໂດຍຕອບສະໜອງຕາມຄຳເຊີນຂອງທ່ານ ຮໍນາມຮົງ ຮອງນາຍົກລັດຖະມົນຕີກຳປູເຈຍ, ທ່ານ ຢາງເຈສື ທີ່ປຶກສາແຫ່ງລັດຈີນຈະຢ້ຽມຢາມກຳປູເຈຍແລະເປັນປະທານກອງປະຊຸມຄະນະກຳມະການປະສານງານລະຫວ່າງລັດຖະບານຈີນ-ກຳປູເຈຍຄັ້ງທີ 4 ແຕ່ວັນທີ 27-28 ເມສານີ້.
ທ່ານ ເກີງສວງກ່າວວ່າ, ໃນໂອກາດຢ້ຽມຢາມ, ທ່ານ ຢາງເຈສື ຈະເຂົ້າຢ້ຽມຄຳນັບສົມເດັດ ນະໂລດົມ ສີຫະໂມນີ ແລະທ່ານ ຮຸນແຊນ ນາຍົກລັດຖະມົນຕີ ພ້ອມທັງຮ່ວມກັບທ່ານ ຮໍນາມຮົງ ເປັນປະທານກອງປະຊຸມຄະນະກຳມະການປະສານງານລະຫວ່າງລັດຖະບານຈີນ-ກຳປູເຈຍຄັ້ງທີ 4 ໂດຍຈະວາງແຜນການຮ່ວມມືໃນທຸກຂົງເຂດ ເພື່ອຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ຂະຫຍາຍກ້າວສູ່ລວງເລິກກວ່າເກົ່າ.