ວັນທີ 25 ເມສານີ້ຢູ່ນະຄອນຫຼວງແບັກແລັງປະເທດເຢຍລະມັນ, ທ່ານນາງແອນເຈີລາ ເມີເກວ ນາຍົກລັດຖະມົນຕີເຢຍລະມັນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນໂອກາດເດີນທາງຢ້ຽມຢາມເຢຍລະມັນຢ່າງເປັນທາງການທັງເຂົ້າຮ່ວມກອງປະຊຸມສົນທະນາດ້ານການຕ່າງປະເທດກັບຍຸດທະສາດຄວາມໝັ້ນຄົງຈີນ-ເຢຍລະມັນຮອບທີ 3. ໂອກາດດັ່ງກ່າວ, ທ່ານນາງເມີເກວຢືນຢັນວ່າ ຂ້າພະເຈົ້າສະໜັບສະໜູນຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ທີ່ສະເໜີໂດຍທ່ານປະທານສີຈິ້ນຜິງ ທັງອວຍພອນໃຫ້ກອງປະຊຸມສຸດຍອດເວທີປຶກສາຫາລື "ໜຶ່ງແລວທາງໜຶ່ງເສັ້ນທາງ"ຈົ່ງປະສົບຜົນສຳເລັດຢ່າງຈົບງາມ ແລະເຢຍລະມັນກຳລັງເອົາໃຈໃສ່ກະກຽມກອງປະຊຸມສຸດຍອດຈີ20ທີ່ຈະຈັດຂຶ້ນຢູ່ເມືອງແຮມເບີກ ແລະເຊື່ອໝັ້ນວ່າ ຈາກການສະໜັບສະໜູນຂອງຈີນ, ກອງປະຊຸມນີ້ຈະປະສົບຜົນສຳເລັດທີ່ດີຢ່າງແນ່ນອນ.
ທ່ານຫວາງຢີ້ກ່າວວ່າ, ປີນີ້ເປັນປີຄົບຮອບ 45 ປີຂອງການສ້າງຕັ້ງສາຍພົວພັນທາງການທູດຈີນ-ເຢຍລະມັນ ແລະຫວັງຖືໂອກາດນີ້ເພື່ອຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານຈີນ-ເຢຍລະມັນໃຫ້ກ້າວຂຶ້ນສູ່ລະດັບໃໝ່, ແລະຈີນຍິນດີເປັນຢ່າງຍິ່ງສືບຕໍ່ສະໜັບສະໜູນເຢຍລະມັນເປັນເຈົ້າພາບຈັດກອງປະຊຸມສຸດຍອດຈີ 20 ແຮມເບີກໃຫ້ປະສົບຜົນສຳເລັດ ແລະຜ່ານຈາກການຮ່ວມມືຍຸດທະສາດຈີນ-ເຢຍລະມັນເພື່ອຊຸກຍູ້ການຮ່ວມມືສາກົນ.
ສອງຝ່າຍຍັງໄດ້ລົງເລິກແລກປ່ຽນຄວາມເຫັນກ່ຽວກັບສະຫະພາບເອີຣົບປະຕິບັດພັນທະຕາມມາດຕາ 15 ຂອງອະນຸສັນຍາວ່າດ້ວຍຈີນເຂົ້າເປັນສະມາຊິກອົງການການຄ້າໂລກ ແລະບັນຫາອື່ນໆທີ່ທັງສອງຝ່າຍສົນໃຈຮ່ວມກັນ.