ພິທີເປີດນຳໃຊ້ກຳປັ່ນບັນທຸກເຮືອບິນລຳທີສອງຂອງຈີນໄດ້ຈັດຂຶ້ນຢູ່ໂຮງຕໍ່ເຮືອຕ້າລຽນກຸ່ມບໍລິສັດອຸດສາຫະກຳໜັກກຳປັ່ນຈີນຢູ່ເມືອງຕ້າລຽນແຂວງລຽວນິງ ທາງພາກຕາເວັນອອກສຽງເໜືອ ສປ ຈີນໃນຕອນເຊົ້າວັນທີ 26 ເມສານີ້ໂດຍທ່ານຟານສາງລົງ ກຳມະການກົມການເມືອງສູນກາງພັກ,ຮອງປະທານຄະນະກຳມະການການທະຫານສູນກາງພັກກອມມູນິດຈີນໄດ້ກ່າວປາໄສໃນພິທີດັ່ງກ່າວ.
ກຳປັ່ນບັນທຸກເຮືອບິນລຳທີສອງດັ່ງກ່າວນີ້ແມ່ນຈີນຄົ້ນຄວ້າຜະລິດເອງໂດຍລົງມືກໍ່ສ້າງໃນເດືອນພະຈິກປີ 2013 ແລະເລີ່ມຕໍ່ເຮືອແຕ່ເດືອນມີນາ 2015. ປັດຈຸບັນ, ພາກສ່ວນຫຼັກແລະລະບົບສຳຄັນຕ່າງໆຂອງກຳປັ່ນໄດ້ສ້າງສຳເລັດເປັນຕົ້ນແມ່ແຮງ,ໄຟຟ້າແລະອຸປະກອນອື່ນໆກໍໄດ້ຕິດຕັ້ງສຳເລັດຮຽບຮ້ອຍແລ້ວ. ການອອກຈາກອູ່ລົງນ້ຳເປັນຂອດສຳຄັນໜຶ່ງໃນການກໍ່ສ້າງກຳປັ່ນບັນທຸກເຮືອບິນ, ເປັນຂີດໝາຍສະແດງໃຫ້ເຫັນວ່າກຳປັ່ນບັນທຸກເຮືອບິນທີ່ຈີນຄົ້ນຄວ້າອອກແບບແລະຜະລິດເອງນັ້ນໄດ້ຮັບໝາກຜົນເປັນຢ່າງຍິ່ງ.