ກອງປະຊຸມປະສານງານການຮ່ວມມືພາກພື້ນຂອງອົງການໄອຍະການຈີນ- ອາຊຽນ ໄດ້ໄຂຂຶ້ນຢູ່ເມືອງນານນິງ ສປ ຈີນໃນວັນທີ 25 ເມສານີ້, ທ່ານ ກົ່ວຊິ່ງວ້າງ ຫົວໜ້າກົມຮ່ວມມືສາກົນອົງການໄອຍະການປະຊາຊົນສູງສຸດຈີນ ກ່າວທີ່ປະຊຸມວ່າ, ການສ້າງເວັບໄຊທາງການຂອງກອງປະຊຸມໄອຍະການສູງສຸດຈີນ-ອາຊຽນ ແລະ ສູນຖອດຖອນບົດຮຽນແລະອົບຮົມເຈົ້າໜ້າທີ່ໄອຍະການຈີນ-ອາຊຽນໃຫ້ສຳເລັດນັ້ນ ຈະມີຄວາມໝາຍທີ່ດີຕໍ່ການເພີ່ມທະວີການຖອດຖອນບົດຮຽນແລະການຮ່ວມມືລະຫວ່າງອົງການໄອຍະການສອງຝ່າຍຕື່ມອີກ ແລະເປັນການເຕົ້າໂຮມກຳລັງໃນການປາບປາມອາຊະຍາກຳຂ້າມຊາດອີກດ້ວຍ.
ໃນຊຸມປີມໍ່ໆມານີ້, ໄປພ້ອມກັບການໄປມາຫາສູ່ກັນລະຫວ່າງຈີນກັບພາກພື້ນອາຊຽນນັບມື້ນັບແໜ້ນແຟ້ນ, ອາຊະຍາກຳຂ້າມຊາດ ກໍມີທ່າອ່ຽງເພີ່ມຂຶ້ນເລື້ອຍໆ, ການທີ່ສ້າງເວທີເພື່ອແບ່ງປັນຂໍ້ມູນຂ່າວສານແລະສູນຖອດຖອນແລກປ່ຽນດ້ານວິຊາການທີ່ຫັນໜ້າສູ່ອົງການໄອຍະການບັນດາປະເທດໃນພາກພື້ນນັ້ນ ກາຍເປັນສຽງຮຽກຮ້ອງໂດຍທົ່ວໄປ.
ທ່ານ ກົ່ວຊີ່ງວ້າງ ຊີ້ໃຫ້ເຫັນວ່າ, ເຖິງວ່າເວັບໄຊແລະສູນດັ່ງກ່າວສ້າງຢູ່ເຂດກວາງຊີ ສປ ຈີນກໍຕາມ, ແຕ່ບັນດາປະເທດລ້ວນແຕ່ສາມາດນຳໃຊ້ຜົນປະໂຫຍດແລະໄດ້ຮັບໝາກຜົນຮ່ວມກັນ. ການພັດທະນາແລະປົກປັກຮັກສາ ເວັບໄຊແລະສູນດັ່ງກ່າວ ກໍແມ່ນໜ້າທີ່ ແລະພັນທະຮ່ວມຂອງອົງການໄອຍະການບັນດາປະເທດໃນພາກພື້ນເຊັ່ນດຽວກັນ.