ຕາມຂ່າວCRI: ກອງປະຊຸມວິທະຍຸອາຊີ 2017 ໄດ້ໄຂຂຶ້ນຢູ່ນະຄອນຫຼວງບາງກອກປະເທດໄທໃນວັນທີ 26 ເມສານີ້ ເຊິ່ງມີຫົວຂໍ້ວ່າ: ຈັດທຳລາຍການວິທະຍຸດ້ວຍຄວາມກະຕືລືລົ້ນ, ຜູ້ແທນທີ່ມາຈາກອົງການຈັດຕັ້ງວິທະຍຸຂອງລັດແລະເອກະຊົນ 300 ກວ່າຄົນທີ່ມາຈາກບັນດາປະເທດໃນພາກພື້ນອາຊີປາຊີຟິກໄດ້ເຂົ້າຮ່ວມປະຊຸມ ເພື່ອປຶກສາຫາລືການພັດທະນາຂອງວິທະຍຸໃນອະນາຄົດ.
ໂອກາດນີ້, ທ່ານອອມສິນ ຊີວະພຣັກ ລັດຖະມົນຕີປະຈຳສຳນັກງານນາຍົກລັດຖະມົນຕີໄທໄດ້ກ່າວຄຳປາໄສວ່າ, ວິທະຍຸໄດ້ເສີມຂະຫຍາຍບົດບາດສຳຄັນໃນການພັດທະນາສັງຄົມໄທ. ພາຍໃຕ້ການທ້າທາຍຂອງສື່ໃໝ່ໃນປັດຈຸບັນ, ວິທະຍຸກໍປະເຊີນກັບການປະຕິຮູບ ແລະປ່ຽນຮູບແບບການພັດທະນາ. ທ່ານມີຄວາມຄອງຄອຍຕໍ່ກອງປະຊຸມຄັ້ງນີ້ ແລະຫວັງໃຫ້ຜູ້ເຂົ້າຮ່ວມທັງໝົດນຳໃຊ້ໂອກາດດັ່ງກ່າວ, ແບ່ງປັນປະສົບການເຊິ່ງກັນແລະກັນ ພ້ອມທັງວາງແຜນການພັດທະນາຂອງວິທະຍຸໃນອະນາຄົດຮ່ວມກັນ.
ຂ່າວແຈ້ງວ່າ, ກອງປະຊຸມຄັ້ງນີ້ຈະດຳເນີນໄປເປັນເວລາສາມວັນ, ຜູ້ແທນທີ່ຮ່ວມປະຊຸມຈະແບ່ງເປັນຈຸປຶກສາຫາລືຫົວຂໍ້ຕ່າງໆ ເຊັ່ນ: ວິທະຍຸຊຸມຊົນ, ວິທະຍຸຊ່ວຍເຫຼືອກູ້ໄພ, ຄວນສື່ສານກັບຜູ້ຟັງແນວໃດ ແລະເຮັດແນວໃດໃຫ້ເປັນເຈົ້າການຂອງວິທະຍຸ.