ຕາມຂ່າວສານຈີນ: ທ່ານສົມຄິດ ຈະຕຸພິທັກ ຮອງນາຍົກລັດຖະມົນຕີໄທຈະນຳພາຄະນະຜູ້ແທນເສດຖະກິດໄປຢ້ຽມຢາມເຂດບໍລິຫານພິເສດຮົງກົງຂອງຈີນເປັນເວລາ 4 ວັນ ແລະຈະເຂົ້າຢ້ຽມຄຳນັບພ້ອມທັງພົບປະກັບທ່ານນາງຫຼິນເຈິ້ງຢົ້ວເອີ ວ່າທີ່ຜູ້ວ່າການເຂດບໍລິຫານພິເສດຮົງກົງ.
ຮົງກົງເປັນແຫຼ່ງການລົງທຶນທີ່ສຳຄັນຂອງໄທ ແລະກໍເປັນຕະຫຼາດສົ່ງອອກເຂົ້າສານທີ່ໃຫຍ່ທີ່ສຸດຂອງໄທ, ສອງຝ່າຍຍັງຈະລົງເລິກປຶກສາຫາລືກັນກ່ຽວກັບການຄ້າແລະການສົ່ງອອກເຂົ້າສານຂອງໄທໄປຮົງກົງ.
ໃນຖານະເປັນກຸ່ມເສດຖະກິດໃຫຍ່ອັນດັບສອງຂອງອາຊຽນ, ໃນຫຼາຍປີມານີ້, ໄທໄດ້ຮັກສາການພົວພັນໃນດ້ານເສດຖະກິດ, ການຄ້າ ແລະວັດທະນະທຳກັບຮົງກົງຢ່າງແໜ້ນແຟ້ນ. ສະຖິຕິການຄ້າຕໍ່ຕ່າງປະເທດທີ່ພະແນກສະຖິຕິອຳນາດການປົກຄອງເຂດບໍລິຫານພິເສດຮົງກົງເປີດເຜີຍຫຼ້າສຸດສະແດງໃຫ້ເຫັນວ່າ, ເດືອນມີນາປີນີ້, ຍອດມູນຄ່າສິນຄ້າທີ່ຮົງກົງນຳເຂົ້າຈາກໄທໄດ້ເພີ່ມຂຶ້ນກວ່າ 10% ເມື່ອທຽບກັບໄລຍະດຽວກັນຂອງປີກາຍ.