ກອງປະຊຸມຄະນະກຳມະການປະສານງານລະຫວ່າງລັດຖະບານຈີນ-ກຳປູເຈຍເທື່ອທີ 4 ໄດ້ຈັດຂຶ້ນຢູ່ນະຄອນຫຼວງພະນົມເປັນປະເທດກຳປູເຈຍໃນວັນທີ 27 ເມສານີ້ໂດຍການເປັນປະທານຮ່ວມຂອງທ່ານຢາງເຈສື ທີ່ປຶກສາແຫ່ງລັດຈີນແລະທ່ານຮໍນາມຮົງ ຮອງນາຍົກລັດຖະມົນຕີກຳປູເຈຍ ໃນກອງປະຊຸມຄັ້ງນີ້, ສອງຝ່າຍໄດ້ທົບທວນຄືນຢ່າງຮອບດ້ານກ່ຽວກັບຄວາມຄືບໜ້າສຳຄັນຂອງການຮ່ວມມືລະຫວ່າງສອງປະເທດນັບແຕ່ກອງປະຊຸມເທື່ອທີ 3 ເປັນຕົ້ນມາ, ທັງກຳນົດແຜນການແລກປ່ຽນແລະຮ່ວມມືລະຫວ່າງສອງຝ່າຍໃນ 1 ປີຕໍ່ໜ້າແລະຂົງເຂດອື່ນໆອີກ.
ທັງສອງຝ່າຍລ້ວນແຕ່ເນັ້ນວ່າ: ສາຍພົວພັນຈີນ-ກຳປູເຈຍຂະຫຍາຍຕົວກ້າວສູ່ລວງເລິກຢ່າງຮອບດ້ານ ແລະການພົວພັນລະຫວ່າງການນຳຂັ້ນສູງມີບົດບາດສຳຄັນຫຼາຍໃນການເສີມຂະຫຍາຍສາຍພົວພັນລະຫວ່າງສອງຝ່າຍ. ຈີນຍິນດີຕ້ອນຮັບທ່ານນາຍົກລັດຖະມົນຕີຮຸນແຊນທີ່ຈະເດີນທາງມາຢ້ຽມຢາມຈີນທັງເຂົ້າຮ່ວມກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ໃນເດືອນພຶດສະພາໜ້ານີ້ ແລະສອງຝ່າຍຈະປະສານສົມທົບກັນຢ່າງຕັ້ງໜ້າ ເພື່ອກະກຽມວຽກງານທີ່ກ່ຽວຂ້ອງຕ່າງໆໃຫ້ດີ.
ສອງຝ່າຍເປັນເອກະພາບກັນເຫັນດີເລັ່ງລັດການຮ່ວມມືໃນຂົງເຂດຕ່າງໆ, ເປີດກວ້ງການຄ້າລະຫວ່າງສອງຝ່າຍ, ພະຍາຍາມສູ້ຊົນເພື່ອບັນລຸເປົ້າໝາຍເຮັດໃຫ້ມູນຄ່າການຄ້າສອງຝ່າຍບັນລຸ 5 ຕື້ໂດລາສະຫະລັດໃນປີ 2017 ຕາມເວລາທີ່ກຳນົດໄວ້ ທັງເພີ່ມທະວີການປະສານສົມທົບໃນຂອບຫຼາຍຝ່າຍເປັນຕົ້ນ ອົງການສະຫະປະຊາຊາດ,ກົນໄກຮ່ວມມືຈີນ-ອາຊຽນແລະອື່ນໆ.