ຕາມຂ່າວສານຊິນຮວາ: ວັນທີ 27 ເມສານີ້, ບຸກຄົນວົງການສາສະໜາແລະອົງການຈັດຕັ້ງສັງຄົມ ພ້ອມດ້ວຍຜູ້ຮັກຫອມສັນຕິພາບຂອງສ.ເກົາຫຼີເກືອບຮ້ອຍຄົນ ໄດ້ເຕົ້າໂຮມກັນນັ່ງມິດງຽບແລະອົດອາຫານຢູ່ສະໜາມຫຼວງກວງຮວາມູນນະຄອນຫຼວງເຊອຸນ ເພື່ອປະທ້ວງສ.ເກົາຫຼີແລະອາເມລິກາຕິດຕັ້ງລະບົບທັດ ຫຼື thaad ເພື່ອຕໍ່ຕ້ານຂີປະນາວຸດຢູ່ເມືອງຊິງຈູ.
ຜູ້ຮັບຜິດຊອບຈັດກິດຈະກຳດັ່ງກ່າວກ່າວວ່າ, ກິດຈະກຳຄັ້ງນີ້ເປັນຂີດໝາຍສະແດງໃຫ້ເຫັນເຖິງການເລີ່ມຕົ້ນຂອງຂະບວນການຕໍ່ຕ້ານລະບົບທັດຮອບໃໝ່ ແລະຈະບໍ່ຍອມຮັບຕໍ່ການຕິດຕັ້ງລະບົບທັດຢ່າງເດັດຂາດ. ອຸປະກອນສ່ວນໜຶ່ງຂອງລະບົບທັດຂົນສົ່ງເຖິງບ່ອນຕິດຕັ້ງໂດຍບໍ່ໄດ້ຮັບຄວາມເຫັນດີຈາກປະຊາຊົນທ້ອງຖິ່ນແລະປະຊາຊົນສ.ເກົາຫຼີ. ຈຸດປະສົງຂອງກິດຈະກຳຄັ້ງນີ້ ກໍເພື່ອສະແດງພະລັງຄວາມສາມັກຄີຂອງປະຊາຊົນ ເລີ່ມການຕໍ່ສູ້ໃໝ່ເພື່ອຂັບໄລ່ລະບົບທັດອອກຈາກປະເທດຕົນ.
ຕອນຮຸ່ງເຊົ້າວັນທີ 26 ເມສານີ້, ພາຍໃຕ້ການປ້ອງກັນຈາກຕຳຫຼວດຫຼາຍພັນຄົນ, ອຸປະກອນສ່ວນໜຶ່ງຂອງລະບົບທັດໄດ້ຂົນສົ່ງເຖິງສະໜາມກອ໋ບຟເມືອງຊິງໂຈແລ້ວ. ໃນຂະນະດຽວກັນ, ປະຊາຊົນທ້ອງຖິ່ນແລະບຸກຄົນທີ່ຮັກຫອມສັນຕິພາບທີ່ຕ້ານລະບົບທັດ ໄດ້ປະທະກັບຕຳຫຼວດ ສົ່ງຜົນເຮັດໃຫ້ 6 ຄົນບາດເຈັບແລະຖືກສົ່ງໄປປິ່ນປົວຢູ່ໂຮງໝໍແລ້ວ.