ວັນທີ 28 ເມສານີ້, ສະພາສູງອາເມລິກາໄດ້ຮັບຮອງເອົາຮ່າງກົດໝາຍວ່າດ້ວຍການຈັດສັນງົບປະມານຊົ່ວຄາວເປັນເວລາພຽງ 1 ອາທິດ ເພື່ອຫຼີກເວັ້ນບໍ່ໃຫ້ລັດຖະບານສະຫະລັດປິດບໍລິການ ຂະນະທີ່ສະພາຕ່ຳໄດ້ຮັບຮອງເອົາຮ່າງກົດໝາຍດັ່ງກ່າວແລ້ວໃນຕອນເຊົ້າວັນດຽວກັນ ເຊິ່ງໝາຍຄວາມວ່າເມື່ອຍື່ນຮ່າງກົດໝາຍສະບັບດັ່ງກ່າວໃຫ້ທ່ານໂດນັນທຣຳ ປະທານາທິບໍດີອາເມລິກາລົງນາມແລ້ວກໍຈະເກີດຜົນສັກສິດທັນທີ.
ຮ່າງກົດໝາຍສະບັບດັ່ງກ່າວຮັບປະກັນໃຫ້ພາກສ່ວນຕ່າງໆຂອງລັດຖະບານສະຫະລັດອາເມລິກາສາມາດດຳເນີນງານເຮັດວຽກຕາມປົກກະຕິໄດ້ສະເພາະແຕ່ວັນທີ 28 ເມສາຫາວັນທີ 5 ພຶດສະພາ 2017 ເທົ່ານັ້ນ.
ງົບປະມານລັດຖະບານສະຫະລັດເປັນຈຸດສຸມແຂ່ງຂັນທາງການເມືອງລະຫວ່າງສອງພັກຂອງລັດຖະສະພາອາເມລິກາມາໂດຍຕະຫຼອດ. ເດືອນຕຸລາປີ 2013, ການແຂ່ງຂັນທາງການເມືອງກ່ຽວກັບແຜນງົບປະມານລະຫວ່າງສອງພັກເຄີຍເຮັດໃຫ້ບາງພາກສ່ວນຂອງລັດຖະບານສະຫະລັດອາເມລິກາຈຳຕ້ອງປິດບໍລິການເປັນເວລາ 16 ວັນ.