ພົບປະກັນລະຫວ່າງລັດຖະມົນຕີການຕ່າງປະເທດຈີນ-ອາເມລິກາ
2017-04-29 15:18:36 cri
ຕາມຂ່າວ CRI: ວັນທີ 28 ເມສານີ້ ໃນໄລຍະເຂົ້າຮ່ວມກອງປະຊຸມລະດັບລັດຖະມົນຕີກ່ຽວກັບບັນຫານິວເຄລຍແຫຼມເກົາຫຼີຂອງສະພາຄວາມໝັ້ນຄົງອົງການສະຫະປະຊາຊາດທີ່ນະຄອນນິວຢອກແຫ່ງອາເມລິກາ, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານເລສ ທິເລີຊົນ ລັດຖະມົນຕີກະຊວງການຕ່າງປະເທດອາເມລິກາ.
ໃນການພົບປະ, ທ່ານຫວາງຢີ້ກ່າວວ່າ, ການຕິດຕໍ່ພົວພັນກັນຢ່າງແໜ້ນແຟ້ນລະຫວ່າງປະມຸກລັດສອງປະເທດ ຈະມີບົດບາດສຳຄັນທີ່ສຸດໃນການຊຸກຍູ້ການພັດທະນາການພົວພັນລະຫວ່າງສອງປະເທດ. ຈີນ-ອາເມລິກາໄດ້ສ້າງກົນໄກສົນທະນາລະດັບສູງ 4 ກົນໄກອອກມາແລ້ວ ສອງຝ່າຍຄວນຊຸກຍູ້ໃຫ້ກົນໄກເຫຼົ່ານີ້ກ້າວໄປໜ້າໂດຍໄວ ເພື່ອໃຫ້ບັນລຸຄວາມເປັນເອກະພາບກັນຫຼາຍກວ່າເກົ່າ, ຄວບຄຸມຄວາມເຫັນທີ່ຂັດແຍ້ງກັນ, ຮັບປະກັນໃຫ້ການພົວພັນລະຫວ່າງຈີນ-ອເມລິກາໄດ້ຮັບການພັດທະນາຢ່າງປອດໃສແລະໝັ້ນທ່ຽງໃນໄລຍະໃໝ່.
ທ່ານທິເລີຊົນກ່າວວ່າ, ອາເມລິກາຄອງຄອຍດຳເນີນການສົນທະນາລະດັບສູງໃນທຸກຂົງເຂດກັບຈີນ, ເພີ່ມທະວີການແລກປ່ຽນ ແລະຮ່ວມມືກັນ ເພື່ອຮັບມືກັບສິ່ງທ້າທາຍຕ່າງໆນາໆ.
ສອງຝ່າຍລ້ວນແຕ່ເຫັນວ່າສະຖານະການຢູ່ແຫຼມເກົາຫຼີໃນປັດຈຸບັນໄດ້ກາຍເປັນສິ່ງທ້າທາຍອັນໜຶ່ງ, ລ້ວນແຕ່ກ່າວຢ້ຳເຖິງເປົ້າໝາຍທີ່ເຮັດໃຫ້ແຫຼມເກົາຫຼີປອດນິວເຄລຍ, ແລະໃຫ້ຄຳໝັ້ນສັນຍາວ່າຈະປະຕິບັດຕາມມະຕິຕົກລົງຂອງສະພາຄວາມໝັ້ນຄົງຂອງອົງການສະຫະປະຊາຊາດຢ່າງເຂັ້ມງວດ ພ້ອມທັງຍຶດໝັ້ນຈະແກ້ໄຂບັນຫານີ້ດ້ວຍສັນຕິວິທີ ແລະປຶກສາຫາລືກັນ ເພື່ອແກ້ໄຂສະຖານະການອັນເຄັ່ງຕຶງຂອງແຫຼມເກົາຫຼີໃນປັດຈຸບັນ.