ການພັດທະນາ 50 ປີຂອງອາຊຽນຖືເປັນສັກຂີພິຍານໃຫ້ແກ່ໂລກາພິວັດແລະການຫັນເປັນອັນໜຶ່ງອັນດຽວກັນຂອງພາກພື້ນ
2017-04-29 15:21:33 cri
ວັນທີ 29 ເມສານີ້ ຜູ້ນຳບັນດາປະເທດອາຊຽນໄດ້ເຕົ້າໂຮມກັນຢູ່ທີ່ນະຄອນຫຼວງມານີລາຂອງຟິລິບປິນ ທີ່ເປັນສະຖານທີ່ຈັດກອງປະຊຸມສຸດຍອດອາຊຽນປີນີ້ ເຊິ່ງປີນີ້ ທີ່ປະຊຸມແມ່ນມີບັນຍາກາດທີ່ຄຶກຄື້ນກວ່າທຸກປີທີ່ຜ່ານມາ ເພາະວ່າ ປີນີ້ເປັນການຄົບຮອບ 50 ປີແຫ່ງການສ້າງຕັ້ງອາຊຽນຂຶ້ນ. ເມື່ອເຄິ່ງສັດຕະວັດກ່ອນ 5 ປະເທດ ຄື ໄທ ອິນໂດເນເຊຍ ສິງກະໂປ ຟິລິບປິນ ແລະມາເລເຊຍໄດ້ປະກາດ "ຖະແຫຼງການຮ່ວມກ່ຽວກັບການສ້າງຕັ້ງປະມາຄົມປະເທດອາຊີຕາເວັນອອກສຽງໃຕ້" ຢູ່ທີ່ນະຄອນຫຼວງບາງກອກແຫ່ງປະເທດໄທ ອັນເປັນການກຳເນີດຂອງອາຊຽນ.
ໃນຕະຫຼອດໄລຍະ 50 ປີນີ້ ອາຊຽນໃນຖານະເປັນອົງການຈັດຕັ້ງພາກພື້ນແຫ່ງໜຶ່ງໄດ້ເຕີບໃຫຍ່ຂະຫຍາຍຕົວອອກເລື້ອຍໆ, ມີປະຊາກອນທັງໝົດ 640 ລ້ານຄົນ, ລວມຍອດເສດຖະກິດເກືອບເຖິງ 3 ພັນຕື້ໂດລາສະສະລັດ, ກາຍເປັນອົງກອນເສດຖະກິດໃຫຍ່ອັນດັບທີ 7 ໃນໂລກ. ທ້າຍປີ 2015 ອາຊຽນໄດ້ສ້າງເປັນປະຊາຄົມອາຊຽນ. ອາຊຽນໃນຖານະເປັນອົງກອນໜຶ່ງ ໄດ້ຮັກສາໃຫ້ເສດຖະກິດເຕີບໂຕດ້ວຍຈັງຫວັດສະເລ່ຍ 5% ຂຶ້ນໄປໃນເວລາ 10 ກວ່າປີທີ່ຜ່ານມາ, ກາຍເປັນສ່ວນປະກອບທີ່ສຳຄັນຂອງອົງກອນເສດຖະກິດທີ່ຈະເລີນໃໝ່ ແລະເປັນໜຶ່ງທີ່ມີການເຕີບໂຕທາງເສດຖະກິດໄວທີ່ສຸດໃນໂລກ. ແຕ່ວ່າລະດັບການສ້າງສາພື້ນຖານໂຄງລ່າງຍັງອ່າວຫຼ້າຫຼັງ, ລະດັບການພັດທະນາຂອງບັນດາປະເທດສະມາຊິກຍັງແຕກໂຕນກັນຫຼາຍ ອັນໄດ້ກາຍເປັນສິ່ງທ້າທາຍທີ່ໃຫຍ່ທີ່ສຸດສຳລັບການພັດທະນາຂອງອາຊຽນ.
ຜູ້ນຳບັນດາປະເທດອາຊຽນເຄີຍກ່າວໄວ້ຫຼາຍເທື່ອໃນສະຖານທີ່ທີ່ຕ່າງກັນວ່າ ການທີ່ສືບຕໍ່ຊຸກຍູ້ການຫັນເປັນອັນໜຶ່ງອັນດຽວກັນ, ເປັນເຈົ້າການເຂົ້າຮ່ວມໂລກາພິວັດ, ເຊິ່ງລວມທັງໃຫ້ການພັດທະນາຂອງຕົນເອງເຊື່ອມຈອດກັບຂໍ້ລິເລີ່ມ "ໜຶ່ງແລວທາງ ໜຶ່ງເສັ້ນທາງ" ຈິ່ງສາມາດເຮັດໃຫ້ການພັດທະນາຂອງອາຊຽນໃນອະນາຄົດໄດ້ຮັບພະລັງແມ່ແຮງຢ່າງຕໍ່ເນຶ່ອງໄດ້ ເຊິ່ງກໍ່ແທດເໝາະກັບຫົວຂໍ້ຫຼັກຂອງກອງປະຊຸມສຸດຍອດອາຊຽນປີນີ້ຄື: ຮ່ວມມືເພື່ອການປ່ຽນແປງ ຜູກພັນກັບສາກົນ.