ຫ້ອງຮຽນໃໝ່ທີ່ສະຖານທູດຈີນປະຈຳມຽນມາບໍລິຈາກເງິນກໍ່ສ້າງໃຫ້ໂຮງຮຽນກຳພ້າສອງແຫ່ງຢູ່ມີຄີນາເມືອງເອກລັດກະຊິນ ທາງພາກເໜືອມຽນມາໄດ້ເປີດນຳໃຊ້ຢ່າງເປັນທາງການໃນວັນທີ 28 ເມສານີ້.
ໃນພິທີເປີດນຳໃຊ້ຫ້ອງຮຽນໃໝ່ດັ່ງກ່າວ, ທ່ານຫົງລ້ຽງ ເອກອັກລັດຖະທູດຈີນປະຈຳມຽນມາກ່າວວ່າ: ບໍ່ມີສັນຕິພາບກໍຈະບໍ່ມີການພັດທະນາ, ຈີນຈະສືບຕໍ່ເສີມຂະຫຍາຍບົດບາດເກ່ຍກ່ອມໃຫ້ເຈລະຈາໂດຍສັນຕິ ໂດຍພະຍາຍາມຢ່າງບໍ່ລົດລະເພື່ອເຮັດໃຫ້ມຽນມາພ້ອມດ້ວຍລັດກະຊິນບັນລຸສັນຕິພາບຖາວອນ ທັງໃຫ້ການຊ່ວຍເຫຼືອຕາມຄວາມສາມາດຂອງຕົນແກ່ການພັດທະນາເສດຖະກິດ-ສັງຄົມ, ການສຶກສາ, ສາທາລະນະສຸກແລະວຽກງານອື່ນໆຂອງມຽນມາແລະລັດກະຊິນ.
ຂ່າວແຈ້ງວ່າ: ສະຖານທູດຈີນປະຈຳມຽນມາໄດ້ຕັ້ງໂຄງການໂຮງຮຽນມິດຕະພາບຈີນ-ມຽນມາຂຶ້ນ, ຄາດວ່າ ຮອດທ້າຍປີ 2017 ນີ້, ນັບລວມແລ້ວຈະເປີດນຳໃຊ້ໂຮງຮຽນ 20 ກວ່າຫຼັງທີ່ນອນຢູ່ໃນໂຄງການ"ໂຮງຮຽນມິດຕະພາບຈີນ-ມຽນມາ". ໂດຍຖືເປັນການປະສານສົມທົບກັບການຊ່ວຍເຫຼືອເງິນທຶນກໍ່ສ້າງໂຮງຮຽນ, ສະຖານທູດຈີນຍັງໄດ້ສ້າງຕັ້ງທຶນການສຶກສາມິດຕະພາບຈີນ-ມຽນມາເພື່ອຊ່ວຍເຫຼືອນັກຮຽນນັກສຶກສາທີ່ທຸກຍາກ ທັງສະໜັບສະໜູນນັກຮຽນເກັ່ງທີ່ຮຽນຈົບຈາກໂຮງຮຽນມິດຕະພາບຈີນ-ມຽນມານັ້ນເດີນທາງໄປຄົ້ນຄວ້າຮ່ຳຮຽນຢູ່ຈີນ.