ກອງປະຊຸມສຸດຍອດອາຊຽນຄັ້ງທີ 30 ທີ່ດຳເນີນມາເປັນເວລາ 4 ວັນໄດ້ອັດລົງແລ້ວໃນວັນທີ 29 ເມສານີ້ຢູ່ນະຄອນຫຼວງມະນີລາປະເທດຟີລິບປິນ.
ກອງປະຊຸມພາຍໃນຂອງຜູ້ນຳ 10 ປະເທດສະມາຊິກອາຊຽນທີ່ຈັດຂຶ້ນໃນວັນດັ່ງກ່າວໄດ້ແລກປ່ຽນຄວາມຄິດຄວາມເຫັນກ່ຽວກັບອະນາຄົດການເຊື່ອມໂຍງເຂົ້າເປັນອັນດຽວກັນຂອງອາຊຽນພ້ອມດ້ວຍບັນຫາກ່ຽວກັບສັນຕິພາບແລະສະຖຽນລະພາບຂອງພາກພື້ນນີ້.
ໂອກາດກ່າວປາໄສໃນກອງປະຊຸມຄົບຄະນະຜູ້ນຳປະເທດອາຊຽນໃນວັນທີ 29 ເມສານີ້, ທ່ານໂຣດຣີໂກ ດູເຕີເຕ ປະທານາທິບໍດີຟີລິບປິນ ປະເທດປະທານໝູນວຽນອາຊຽນໄດ້ເນັ້ນເຖິງຮູບແບບອາຊຽນທີ່ມີເອກະລັກສະເພາະຕົວຂອງອາຊຽນໂດຍຢືນຢັນວ່າ ໃນຂະບວນການເຊື່ອມໂຍງເຂົ້າເປັນອັນດຽວກັນ, ບັນດາປະເທດສະມາຊິກອາຊຽນຍັງຄວນເຄົາລົບເຊິ່ງກັນແລະກັນຕໍ່ເອກະລາດ,ອະທິປະໄຕ,ສະເໝີພາບແລະຜືນແຜ່ນດິນອັນຄົບຖ້ວນ. ທ່ານດູເຕີເຕຍັງຢືນຢັນຕື່ມວ່າ ສາຍພົວພັນຄູ່ເຈລະຈາລະຫວ່າງອາຊຽນກັບປະເທດຄູ່ເຈລະຈາທີ່ສ້າງຂຶ້ນພາຍໃຕ້ເງື່ອນໄຂເຄົາລົບເຊິ່ງກັນແລະກັນ,ຕ່າງຝ່າຍຕ່າງມີຜົນປະໂຫຍດແລະຕ່າງບໍ່ແຊກແຊງວຽກງານພາຍໃນຂອງກັນນັ້ນຈະນຳເອົາຜົນສຳເລັດທີ່ມີປະສິດທິຜົນແລະມີລັກສະນະສ້າງສັນມາສູ່ບັນດາຝ່າຍໃຫ້ຫຼາຍກວ່າເກົ່າ.
ກອງປະຊຸມສຸດຍອດອາຊຽນຄັ້ງນີ້ໄດ້ຈັດຂຶ້ນຢູ່ມະນີລາແຕ່ວັນທີ 26-29 ເມສານີ້ໂດຍໄດ້ເຈາະຈົງຫາລື 6 ຫົວຂໍ້ຄື ສ້າງອາຊຽນທີ່ຖືຄົນເປັນຫຼັກ; ສັນຕິພາບແລະສະຖຽນລະພາບຂອງພາກພື້ນ, ຄວາມໝັ້ນຄົງແລະການຮ່ວມມືທາງທະເລ; ການປະດິດສ້າງແລະການເຕີບໂຕແບບກວມລວມ; ເສີມສ້າງຄວາມມີຊີວິດຊີວາຂອງອາຊຽນ; ລັກສະນະໂຕແບບຂອງອາຊຽນໃນຖານະເປັນກຳລັງເຂດແຄວ້ນແລະທົ່ວໂລກ.
 |
