ຜູ້ນຳພັກອິສລາມອາຟການີສະຖານຮຽກຮ້ອງໃຫ້ກຸ່ມປະກອບອາວຸດຕ້ານລັດຖະບານເຂົ້າຮ່ວມຂະບວນວິວັດສັນຕິພາບ
2017-04-30 14:54:03 cri
ໃນງານຊຸມນຸມທີ່ຈັດຂຶ້ນຢູ່ແຂວງລາເຮີມານ ທາງພາກຕາເວອອກຂອງອາຟການີສະຖານໃນວັນທີ 29 ເມສານີ້ ທ່ານກຸນບຸດດິນ ເຮັກມາເທຍ ຜູ້ນຳພັກອິສລາມທີ່ເປັນກຸ່ມປະກອບອາວຸດຕ້ານລັດຖະບານອາຟການີສະຖານກ່າວວ່າ, ກຸ່ມປະກອບອາວຸດຕ້ານລັດຖະບານຄວນເຂົ້າຮ່ວມຂະບວນວິວັດສັນຕິພາບແຫ່ງຊາດ.
ນີ້ແມ່ນການປະກອບຄຳຄິດຄຳເຫັນຢ່າງເປີດເຜີຍເປັນຄັ້ງທຳອິດຂອງທ່ານເຮັກມາເທຍພາຍຫລັງໄດ້ສິ້ນສຸດການຢູ່ຕ່າງປະເທດເປັນເວລາເກືອບ 20 ປີ ແລະກັບຄືນປະເທດໃນຫວ່າງກ່ອນນີ້ບໍ່ດົນ.
ທ່ານກ່າວວ່າ, ກຳລັງພາຍນອກບໍ່ສາມາດນຳເອົາສັນຕິພາບມາໃຫ້ອາຟການີສະຖານໄດ້, ຍິ່ງບໍ່ມີສິດແຊກແຊງວຽກງານພາຍໃນຂອງອາຟການີສະຖານ, ອາຟການີສະຖານຄວນຖອດຖອນບົດຮຽນຈາກປະຫວັດສາດ, ການກໍ່ສົງຄາມຂຶ້ນ ຫຼືສູ້ຮົບກັນດ້ວຍກຳລັງຮຸນແຮງບໍ່ແມ່ນການເລືອກພຽງອັນດຽວທໍ່ນັ້ນ, ໃນໄລຍະປັດຈຸບັນ ບໍ່ມີຄວາມຈຳເປັນທີ່ໃຫ້ປຸກປັ່ນອິດທິກຳລັງທຸກຝ່າຍພາຍໃນທົ່ວປະເທດເກີດການສູ້ຮົບກັນຢ່າງໃຫຍ່.ທ່ານເຮັກມາເທຍໄດ້ຕິຕຽນເຫດການຫຼອນໂຈມຕີຖານທັບທີ່ເກີດຂຶ້ນຢູ່ເມືອງມາຈາຣີຊາຣີຟໃນຫວ່າງມໍ່ໆນີ້. ທ່ານກ່າວວ່າ, ຕາລີບານບຸກໂຈມຕີເປົ້າໝາຍຂອງລັດຖະບານບໍ່ມີຄວາມໝາຍຈັກຢ່າງ, ທ່ານຮຽກຮ້ອງໃຫ້ອົງການຕາລີບານຈົ່ງແກ້ໄຂວິກິດການໂດຍທາງການເມືອງ.
