ເຈົ້າໜ້າທີ່ຟີລິບປິນໄດ້ພົບໜັງສືຜ່ານແດນອິນໂດເນເຊຍຫົວໜຶ່ງຂະນະທີ່ຫຼອນໂຈມຕີຖານທີ່ໝັ້ນກຸ່ມກໍ່ການຮ້າຍທີ່ພາກໃຕ້ຟີລິບປິນໃນອາທິດຜ່ານມາ ເຊິ່ງເຮັດໃຫ້ລັດຖະບານສອງປະເທດນີ້ຈິ່ງເປັນຫ່ວງວ່າກຸ່ມປະກອບອາວຸດອິນໂດເນເຊຍແລະກຸ່ມອາບູຊາເຢັຟ (Abu Sayyaf)ພາກໃຕ້ຟີລິບປິນອາດຈະຮ່ວມມືນັບມື້ແໜ້ນແຟ້ນຂຶ້ນ.
ທ່ານຮາມີດິງ ຫົວໜ້າກົມຕໍ່ຕ້ານການກໍ່ການຮ້າຍແຫ່ງຊາດອິນໂດເນເຊຍເປີດເຜີຍໃຫ້ຮູ້ວ່າ: ຊຸມປີມໍ່ໆມານີ້, ກຸ່ມຫົວຮຸນແຮງISໄດ້ຮຽກໂຮມຜູ້ປະກອບອາວຸດອາຊີຕາເວັນອອກສຽງໃຕ້ຟຶກຊ້ອມການກໍ່ການຮ້າຍຢູ່ພາກໃຕ້ຟີລິບປິນ. ນອກຈາກອິນໂດເນເຊຍແລ້ວ, ຍັງມີຜູ້ປະກອບອາວຸດຈາກມາເລເຊຍ, ບັງກະລາເດັດແລະປະເທດອື່ນໆໃນອາຊີຕາເວັນອອກສຽງໃຕ້ກໍລ້ວນແຕ່ໄດ້ໂຮມສູນຝຶກຊ້ອມຢູ່ແຫ່ງນັ້ນເຊັ່ນກັນ.
ທ່ານຮາມີດິງກ່າວວ່າ: ລັດຖະບານອິນໂດເນເຊຍບໍ່ສາມາດຮັບຮູ້ຈຳນວນແນ່ນອນຂອງຜູ້ປະກອບອາວຸດເຫຼົ່ານີ້ ເພາະວ່າເຂົາເຈົ້າລ້ວນແຕ່ໄດ້ເລັດລອດເຂົ້າເມືອງຢ່າງຜິດກົດໝາຍ ແລະເນື່ອງຈາກນະໂຍບາຍຍົກເວັ້ນວິຊາ, ຜູ້ປະກອບອາວຸດສາມາດເຂົ້າອອກຟີລິບປິນໄດ້ຢ່າງເສລີ.
ໂຄສົກກົມກວດກາຄົນເຂົ້າເມືອງອິນໂດເນເຊຍຊີ້ໃຫ້ເຫັນວ່າ: ເນື່ອງຈາກຂາດແຄນກຳລັງປ້ອງກັນເຂດທະເລຊູລາເວຊີເໜືອ(Sulawesi)ອິນໂດເນເຊຍທີ່ໃກ້ກັບເຂດຊາຍແດນຟີລິບປິນເປັນໄລຍະຍາວນານມານີ້, ສະນັ້ນ, ຫຼາຍປີຜ່ານມາ, ກຸ່ມປະກອບອາວຸດອິນໂດເນເຊຍແລະຟີລິບປິນຈິ່ງນຳໃຊ້ທາງທະເລເຂົ້າອອກສອງປະເທດນີ້ມາໂດຍຕະຫຼອດ.
 |
