ວັນທີ 29 ເມສາຜ່ານມາ, ທ່ານໂດນັນທຣຳ ປະທານາທິບໍດີອາເມລິກາໄດ້ລົງນາມໃນດຳລັດການຄ້າສອງສະບັບໂດຍຕົກລົງສ້າງຕັ້ງຫ້ອງການນະໂຍບາຍການຄ້າແລະຂະແໜງການຜະລິດຂອງທຳນຽບຂາວ ທັງພິຈາລະນາຢ່າງຮອບດ້ານຕໍ່ສັນຍາການຄ້າທັງໝົດຂອງອາເມລິກາທີ່ມີຢູ່ໃນປັດຈຸບັນ.
ຕາມດຳລັດດັ່ງກ່າວ, ຫ້ອງການນະໂຍບາຍການຄ້າແລະຂະແໜງການຜະລິດທຳນຽບຂາວມີໜ້າທີ່ປົກປັກຮັກສາຜົນປະໂຫຍດຂອງກຳມະກອນແລະຜູ້ປະກອບການຜະລິດຂອງອາເມລິກາ ທັງໃຫ້ຂໍ້ສະເໜີແກ່ປະທານາທິບໍດີໃນການສ້າງນະໂຍບາຍວ່າດ້ວຍການສົ່ງເສີມການຂະຫຍາຍຕົວຂອງເສດຖະກິດ,ຫຼຸດຜ່ອນການເສຍປຽບດຸນການຄ້າ, ເສີມຂະຫຍາຍພື້ນຖານຂະແໜງການຜະລິດແລະຂະແໜງການອຸດສາຫະກຳປ້ອງກັນປະເທດຂອງອາເມລິກາ.
ທຳນຽບຂາວອາເມລິກາຢືນຢັນວ່າ: ຫ້ອງການດັ່ງກ່າວຈະກາຍເປັນຜູ້ຕິດຕໍ່ລະຫວ່າງທຳນຽບຂາວກັບກະຊວງການຄ້າອາເມລິກາ ທັງຮັບພາລະໜ້າທີ່ປະຕິບັດໂຄງການພິເສດກ່ຽວກັບການຄ້າຕາມຄວາມຮຽກຮ້ອງຈາກປະທານາທິບໍດີ. ນອກນີ້, ຫ້ອງການດັ່ງກ່າວຍັງຈະຊ່ວຍປັບປຸງນະໂຍບາຍການຈັດຊື້ແລະການຮັບສະໝັກພາຍໃນປະເທດຂອງພາກສ່ວນບໍລິຫານໃຫ້ສົມບູນຂຶ້ນ ເຊິ່ງລວມທັງຈັດຕັ້ງປະຕິບັດດຳລັດວ່າດ້ວຍການຊື້ສິນຄ້າອາເມລິກາແລະການຮັບຈ້າງຄົນອາເມລິກາທີ່ທ່ານທຣຳໄດ້ລົງນາມໃນຫວ່າງມໍ່ໆນີ້.