ປັດຈຸບັນ, ອົງການປົກຄອງເມືອງຊານພາວໂລແຫ່ງເບຼຊິນປະກາດຢ່າງເປັນທາງການວ່າ, ຈະນຳເຂົ້າຍົນບໍ່ມີຄົນຂັບລະດັບສູງ ພ້ອມທັງລະບົບວົງຈອນປິດແບບເຄື່ອນທີ່ທີ່ຕິດຕັ້ງຢູ່ໃນລົດຍົນ ແລະ ຖືໄປມາໄດ້ ຍີ່ຫໍ້ຕ້າຮວາຂອງຈີນ ເພື່ອເພີ່ມທະວີຄວາມສາມາດຮັບມືກັບສະພາວະສຸກເສີນຂອງຕຳຫຼວດ.ນີ້ແມ່ນຍົນທີ່ບໍ່ມີຄົນຂັບລະດັບສູງຂອງຈີນເຂົ້າສູ່ຕະຫຼາດອົງການປົກຄອງຂອງເບຼຊິນເປັນເທື່ອທຳອິດ,ເປັນມີຂີດໝາຍສະແດງໃຫ້ເຫັນວ່າ,
ຂະແໜງການຍົນທີ່ບໍ່ມີຄົນຂັບຂອງຈີນໄດ້ຢ່ວງບາດກ້າວສຳຄັນໃນເວລາເຂົ້າສູ່ຕະຫຼາດອາເມລິກາລາຕິນ.
ທ່ານໂດເລຍ ເຈົ້າເມືອງຊານພາວໂລກ່າວວ່າ, ຢູ່ເຂດຊຸມຊົນທີ່ມັກຈະເກີດສະພາບສຸກເສີນເລື້ອຍໆ, ຍົນທີ່ບໍ່ມີຄົນຂັບສາມາດຍົກສູງຄວາມສາມາດຂອງຕຳຫຼວດໃນການຮັບມືແກ້ໄຂສະພາບສຸກເສີນ, ທ່ານກ່າວວ່າ"ພວກຂ້າພະເຈົ້າມີຄວາມໝັ້ນໃຈຫຼາຍຕໍ່ການນຳເຂົ້າຜະລິດຕະພັນ ແລະ ເຕັກນິກຂອງຈີນ ເພື່ອຍົກສູງສະມັດຕະພາບການຄຸ້ມຄອງບໍລິການສາທາລະນະ ແລະ ສ້າງຕົວເມືອງແບບດີຈິຕອນ".
ໃນໄລຍະຈັດງານກິລາໂອລິປິກຣີໂອປີ 2016, ຜະລິດຕະພັນລະດັບສູງຂອງຈີນຕ່າງໆ ເຊັ່ນ,ລົດໄຟໃຕ້ດິນ, ເຄື່ອງແອ, ກ້ອງຖ່າຍວິດີໂອ ແລະ ຈໍLED ເປັນຕົ້ນໄດ້ຮັບການນຳໃຊ້ຢູ່ໃນງານກິລາດັ່ງກ່າວ, ເຮັດໃຫ້ປະຊາຊົນອາເມລິກາລາຕິນສຸມສາຍຕາໃສ່ຜະລິດຕະພັນຈີນ,ເກີດມີຄວາມຮັບຮູ້ອັນໃໝ່ຕໍ່ສິນຄ້າທີ່ຜະລິດໂດຍຈີນ, ໄດ້ເຮັດໃຫ້ຄວາມຮູ້ກ່ຽວກັບ "ຈີນຜະລິດ" ຂອງປະຊາຊົນທ້ອງຖິ່ນເກີດມີການປ່ຽນແປງ.
